Ապրիլյան պատերազմի օրերին Ստեփանակերտի երկնքում ոչ թե մեկ այլ բազմաթիվ թռչող ԱԹՍ-ներ են եղել, որոնցից մեկը հաջողվել է խոցել: Այս մասին այսօր՝ սեպտեմբերի 2-ին, լրագրողների հետ հանդիպման ժամանակ նշեց Արցախի նախագահ Արայիկ Հարությունյանը՝ անդրադառնալով իր աղմուկ բարձրացրած հայտարարությանը, թե Ապրիլյան պատերազմի ժամանակ Ստեփանակերտի օդն անպաշտպան էր:
«Մի հատ չէր, որ խփել ենք, վերացել է. այստեղ շատերը կհաստատեն, որ տեսել են բազմաթիվ ԱԹՍ-ներ: Ես հիմա չեմ ուզում անդրադառնալ, թե ինչով էր պաշտպանված, ինչն էր աշխատում կամ չէր աշխատում: Բավարարվենք այսքանով»,-ասաց նա:
Անդրադառնալով Արցախի անվտանգության խորհրդի քարտուղար Սամվել Բաբայանի հայտարարությանը, թե նախկին իշխանությունների օրոք բանակցությունների սեղանին դրված է եղել շրջանների վերադարձի հարցը, Արայիկ Հարությունյանն ասաց. «Դա միայն Սամվել Բաբայանը չի ասել, մենք գիտենք, թե ինչ է քննարկվել Մադրիդյան սկզբունքների հետ կապված: Մադրիդյան սկզբունքներում կար հստակ երկու առաջարկություն, մի տարբերակը 5 շրջանի վերադարձ, այնուհետեւ կարգավիճակի քննարկում, մյուս տարբերակը կարծես թե 7 շրջանի վերադարձ, ինչ-որ միջանցք, ապա Ղարաբաղի անկախության ճանաչում, բայց ոչ Ադրբեջանի կողմից: Բայց ճանաչում, թե ոչ ճանաչում, ինձ համար կարեւոր չէ, կարեւորը մեր անվտանգությունն է: Իսկ նման պարագայում մեր անվտանգությունն ավելի խոցելի է դառնում:
Այդ առումով մենք այսօր չենք քննարկում որեւէ տարբերակ, որը կարոող է թուլացնել Արցախի անվտանգության աստիճանը: Մենք քննարկել ենք ՀՀ իշխանությունների հետ, մենք ունենք մեր դիրքորոշումը, մեր պատկերացումները: Նախկինում ավելի շատ խոսում էինք ինքնորոշման իրավունքի ճանաչման, հետո անվտանգության մասին: Հիմա ոչ, գլխավորը անվտանգությունն է: Եթե անվտանգության մի փոքր թուլացում լինի, անկախ նրանից, թե ճանաչման ինչ աստիճան ենք ունենալու, դա նշանակում է Արցախի վերջ: Մենք գիտենք, թե մեր թշնամին ով է: Մեր թշնամու համար որեւէ միջազգային նորմ ու կանոն գոյություն չունի»:
Նա ընդգծեց, որ այդտեղ որեւէ գաղտնիք չկա, դրա մասին հարցազրույցներում նշել է նաեւ Սերժ Սարգսյանը, սակայն փառք Աստծո, որեւէ փաստաթուղթ չի ստորագրվել:
