Դուք մի փաստարկ եք բերում, որը ոչ մի տրամաբանության մեջ չի տեղավորվում: Այս մասին այսօր՝ սեպտեմբերի 4-ին, ԱԺ արտահերթ նիստի ժամանակ ասաց «Իմ քայլը» խմբակցության պատգամավոր Ռուբեն Ռուբինյանը՝ արձագանքելով «Լուսավոր Հայաստան» և «Բարգավաճ Հայաստան» խմբակցության պատգամավորներ Էդմոն Մարուքյանի եւ Նաիրա Զոհրաբյանի հիմնավորումներին՝ կապված Կառավարության կողմից ներկայացված «ՀՀ բնակչության սանիտարահամաճարակային անվտանգության ապահովման մասին և արտակարգ իրավիճակներում բնակչության պաշտպանության մասին օրենքներում և հակակից օրենքներում փոփոխոխություններ և լրացումներ կատարելու մասին օրենքներն առաջին ընթերցմամբ ընդունելու վերաբերյալ հարցի հետ։
Նշենք, որ օրենքի ընդունման արդյունքում սեպտեմբերի 11-ից հետո արտակարգ դրությունը չի երկարաձգվի:
«Այսինքն, ձեր կարծիքով եվրոպական երկրների արտգործնախարարություններում նստած մարդիկ բացում են, լուրերն են կարդում, մեկ էլ՝ վայ, «կարանտին» բառը կա, վերջ, պետք է Հայաստանից ոչ մեկ չգա մեր մոտ: Ձեր կարծիքով այս մակարդակի՞ են որոշումները կայացվում պետական կառավարման ապարատներում տարբեր երկրներում, չէ, այդպես չի, սիրելիներս»,-ասաց Ռուբեն Ռուբինյանը:
Նրա խոսքով, եթե մի երկրից մուտքը կամ ելքը արգելում են համաճարակի ժամանակ, դրա համար մեկ ցուցիչն այն է, թե ինչպիսի հակահամաճարակային վիճակ է այդ երկրում, օրինակ, օրական քանի վարակակիր է գրանցվում: «Եթե դուք հետաքրքրված եք, որ հնարավորինս արագ բացվեն սահմանները, ապա պետք է հետաքրքրված լինեք, որ հնարավորինս արագ վարակման ցուցանիշները շարունակեն իջնել: Իսկ դրա համար անհրաժեշտ են այն միջոցառումները, որոնք իրականացվում են:
Ես ձեզ խնդրում եմ, մի կառուցեք ձեր փաստարկները այս մակարդակի բաների վրա: Թե չէ, հա, կարանք «կարանտին» բառը փոխարինենք «հրաշք» բառով, ձեր կարծիքով բա՞ն է փոխվելու»,-ասաց նա:
Նշենք, որ «Լուսավոր Հայաստան» խմբակցության ղեկավար Էդմոն Մարուքյանը և «Բարգավաճ Հայաստան» խմբակցության պատգամավոր Նաիրա Զոհրաբյանը մտահոգություններ էին հայտնել նախագծի ընդունման հարցում, ըստ նրանց՝ նախագիծը պարունակում է հակասահմանադրական դրույթներ, և կարանտին բառը մտահոգիչ է:
