Բրիտանական Classicmobilia դիլերային ընկերությունը վաճառքի է հանել եզակի Aston Martin Jet 2+2-ը՝ շութինգ-բրեյք թափքով։ Ավտոմեքենան Aston Martin Rapide սեդանի հատուկ տարբերակն է, որը իտալական Bertone ատելյեի կողմից մեկ օրինակով է թողարկվել՝ 2013 թվականին Ժնեւի ավտոսրահում ցուցադրելու համար, հայտնում է «Մոտորը»։ 

Իտալացիները հատուկ տարբերակը նվիրել են բրիտանական մակնիշի հետ համագործակցության 60-ամյակին։ Վերափոխման ընթացքում ամբողջությամբ փոխվել է թափքի հետեւի հատվածը։ Կարբոնից եւ ալյումինից պատրաստված հետեւամասի ձեւավորումը շարժման զգացողություն է առաջացնում նույնիսկ այն ժամանակ, երբ ավտոմեքենան տեղում կանգնած է։

Սրահում մուլտիմեդիայի համակարգի դիսփլեյներ են հայտնվել երկրորդ շարքի ուղեւորների համար, հարդարանքը կաղնուց է, կան հատուկ փոքր գորգեր եւ երկպանել համայնապատկերային տանիք՝ էլեկտրաքրոմային ապակիով, որը փոխում է թափանցիկության մակարդակը։ Երկրորդ շարքի նստատեղերի թիկնակները մինչեւ հատակին հավասար մակարդակ ծալվում են կոճակը սեղմելով, ինչը թույլ է տալիս բեռնախցիկում ավելի շատ բեռ տեղավորել։

Rapide-ի շարժիչն անփոփոխ է մնացել՝ 477 ուժի բենզինային V12 5,9 լիտր ծավալով, որն աշխատում է վեցաստիճանի ավտոմատ փոխանցման տուփի հետ տանդեմում։

Aston Martin Rapide-ը ներկայացվել էր 2009 թվականին գերմանական Ֆրանկֆուրտի ավտոսրահում։ Մեկ տարի հետո, երբ սեդանը վաճառահանվել է, դրա նախնական գինը կազմում էր 201 300 դոլար։ Եզակի մոդելի համար վաճառողը նախատեսում է ստանալ 850 հազար ֆունտ սթերլինգ։