Նոր MC20 կուպեի հետ միասին Maserati ընկերությունը թարմացրել է նաեւ իր ֆիրմային լոգոն՝ Պոսեյդոնի եռաժանին մոնոքրոմ եւ արտաքին տեսքով, ինչպես իտալացիներն են հավաստիացնում, ավելի էլեգանտ ու ժամանակակից է դարձել, գրում է Motor-ը:
Լիովին Maserati-ի կողմից մշակված եւ նախագծված MC20-ը վերջին 16 տարիներին ապրանքանիշի առաջին միջին շարժիչով սուպերքարն է: MC հապավումը նշանակում է Maserati Corse, որն ընդգծում է ընկերության կապը ավտոսպորտի հետ, իսկ 20 թիվը նշում է ընթացիկ տարին: MC20-ի դիզայնում, որի վրա շուրջ երկու տարի աշխատել են, կարելի է գտնել նրա նախորդի՝ MC12-ի արձագանքները, բայց ավելի մանրակրկիտ ստուգումից հետո նկատելի կդառնա, որ բացի այդ, Maserati-ն թարմացրել է ֆիրմային եռաժանին: Նախկինում լոգոն փոխվել էր 2005 թվականին, երբ մի փոքր ուղղել էին Պոսեյդոնի եռաժանու ծայրերի ատամները։
Maserati-ն հայտարարում է, որ վերափոխված լոգոն ավելի էլեգանտ է, ժամանակակից եւ հավասարակշռված: Ռադիատորի ցանցի վրա եռաժանին զրկվել է երկու կարմիր շերտերից եւ դարձել է մոնոքրոմ, իսկ ուղղահայաց օվալաձեւ նշանի վրա կարմիր եռաժանին փոխարինել են կապույտով, ընդ որում նոր` Maserati Blue գույնով: MC20-ի թափքի հետեւի մասում լոգոն կորցրել է օվալաձեւ շրջանակը եւ հիմքում գտնվող կայծակը: Ի վերջո, իտալացիները նաեւ փոխել են Maserati ֆիրմային տառատեսակը՝ այն դարձել է ավելի սուր եւ լակոնիկ, իսկ փայլուն քրոմապատ ծածկույթը փոխարինվել է անփայլ հղկված ալյումինով: