Արաբական Միացյալ Էմիրությունները կզարգացնի հարաբերությունները Իսրայելի հետ՝ անկախ ամերիկյան ղեկավարության փոփոխությունից, Իսրայելի հետ, այսպես կոչված, «Աբրահամյան համաձայնագրի» ստորագրման արարողությանն ընդառաջ ասել է ԱՄԷ արտաքին գործերի պետնախարար Անվար Գարգաշը:
«Ոչ մի պատճառ չկա, որ մոտ ապագայում մենք չկարողանանք ավելի արագ գործել եւ դեսպանություններ ու հյուպատոսություններ բացել»,- ասել է Գարգաշը՝ հավելելով, որ նոր համաձայնագիրը «սահմանում է հարաբերությունների այն տեսակը, որին ձգտելու են երկու պետությունները»:
«Տարիներ շարունակ, յուրաքանչյուր չորսից ութ տարին մեկ մենք հարմարվել ենք Վաշինգտոնի վարչակազմի փոփոխությանը»,- ասել է Գարգաշը՝ անտեսելով այն ենթադրությունները, որ Բայդենի նախագահությունը կարող է չեղարկել գործարքը: «Ես զգում եմ, որ մենք խնդիր չունենք իրականում հարմարվելու ցանկացած փոփոխության՝ լինի դա նախագահ Թրամփի եւս չորս տարին, թե Բայդենի վարչակազմը»,- ասել է նա:
Նա նշել է, որ Իսրայելի հետ հարաբերությունները կարգավորելու իր երկրի որոշումը «առաջընթաց» է տարածաշրջանի համար եւ ստեղծում է ավելի շատ բիզնես հնարավորություններ: «Գաղափարն այն է, որ կառուցվի այն, ինչը ես կանվանեի բարեկամական, բեղմնավոր երկկողմ հարաբերություններ»:
«Ես տեսնում եմ, որ մենք գնում ենք դեպի առեւտրի, ներդրումների եւ համագործակցության ընդլայնում»,- հավելել է նա՝ նշելով, որ առաջիկա ամիսներին լրացուցիչ համաձայնագրեր կստորագրվեն տեխնոլոգիայի, առողջապահության եւ ագրոբիզնեսի վերաբերյալ:
Գարգաշը նաեւ ասել է, որ Իսրայելի կողմից Հորդանան գետի Արեւմտյան ափի նախատեսված անեքսիայի դադարեցումը կդադարեցնի երկու պետությունների լուծման խափանումը՝ հավելելով, որ ռազմավարական բեկում «մեկ օրում տեղի չի ունենա»: «Մենք այնտեղ կլինենք՝ նրանց օգնելու համար»,- նշել է նա։ «Կգա այն գիտակցությունը, որ Բահրեյնի նման երկրների վրա մեր ունեցած լծակները իրականում կօգնեն պաղեստինցիներին իսրայելցիներին համոզել, որ առաջ գնալու ճանապարհը փոխզիջում է պահանջում»:
Գարգաշը նաեւ նշել է, որ ԱՄՆ-ի հետ զենքի հնարավոր վաճառքի շուրջ բանակցությունները շարունակվում են: «F-35 եւ այլ համակարգեր գնելու մեր հայտը եղել է մինչեւ այս համաձայնագիրը»,- ասել է նա:
