Անգլիայի առաջնությունում հանդես եկող Ռուսաստանի ազգային հավաքականի խաղացողներ Անդրեյ Արշավինը, Ռոման Պավլյուչենկոն եւ Դինիյար Բիլյալետդինովը մինչեւ Ադվոկատի թիմի հավաքը սկսվելը մարզումներ կանցկացնեն իրենց նախկին ակումբների հետ: Ռուսաստանի թիմը հավաքը սկսելու է միայն հաջորդ շաբաթ, նախքան այդ ֆուտբոլիստները ցանկանում են չկորցնել մարզավիճակը:
Պավլյուչենկոն Սպորտ-Էքսպրեսի հետ հարցազրույցում նշել է, որ մարզումներ կանցկացնի Մոսկվայի Սպարտակի հետ: Նա նաեւ ասել է, որ լավ տրամադրությամբ արձակուրդ գնալու համար դեռ պետք է հաղթել Հայաստանի հավաքականին:
Բիլյալետդինովը կմարզվի Մոսկվայի Լոկոմոտիվի հետ, իսկ Անդրեյ Արշավինը` Սանկտ Պետերբուրգի Զենիթում:
Եվրոպայի առաջնության Ռուսաստան – Հայաստան ընտրական հանդիպումը տեղի կունենա հունիսի 4-ին Սանկտ Պետերբուրգում: