Հայաստանում ԱՄՆ դեսպանատան դիմաց ակցիա է տեղի ունենում, որի մասնակիցները պահանջում են դեսպան Լին Թրեյսիի հետ հանդիպում։
«Մենք պահանջում ենք մեր հարցերի հստակ պատասխանները, պահանջում ենք հայկական մշակույթի ավերման հստակ գնահատականը։ Բավական է ջայլամային քաղաքականությամբ գլուխը կոխել հողի մեջ և անտեսել մի ամբողջ ժողովրդին, անտեսել Արցախում տեղի ունեցողը։ Սպասում ենք դեսպանի դուրս գալուն»,- հայտարարեց ակցիայի մասնակիցներից մեկը։
Ապա բողոքի ակցիայի մասնակիցները սկսեցին վանկարկել «Պահանջում ենք, պահանջում ենք»։
Բողոքի ակցիային միացել էր նաև հասարակական գործիչ Անահիտ Բախշյանը։ Նա դիմելով ԱՄՆ դեսապանատան աշխատակիցներին, հայտարարեց, որ պահանջում են դեսպանի հետ հանդիպում, որպեսզի վերջինս լսի իրենց ու ասի, թե ի՞նչ է պատրաստվում անել ԱՄՆ-ն։
«Դուք որպես ԵԱՀԿ Մինսկի խմբի համանախագահ երկիր, մեծ պատասխանատվություն եք կրում հայ ժողովրդի համար այս օրհասկան պահին՝ որոշում կայացնել, որպեսզի չկրկնվի 1915թ․-ի դեպքերը։ Մեր բանակն ու պետությունը դա թույլ չեն տա, բայց դուք չեք կարող կողքից նայել, հեռվից հեռու ինչ-որ խորհուրդներ տալ և հորդորներ անել։ Դուք չեք կարող, Հայաստանն այսօր Արցախի հետ միասին կռիվ է տալիս ահաբեկչական Թուրքիայի, Ադրբեջանի և Սիրայից ահաբեկիչների դեմ, դուք իրավունք չուենեք անտարբեր նայել այս ամենին»,- ընդգծեց Անահիտ Բախշյանը։
