Բավականին աճել են թվերը, և սա պայմանավորված է հիմնականում ռազմական դրության հետ կապված բնակչության հավելյալ շարժով։ Բայց առողջապահության հանակարգն այս պահին վերահսկում է իրավիճակը՝ բուժօգնություն տրամադրելու մասով։ Այս մասին այսօր՝ հոկտեմբերի 21-ին, խորհրդարանում լրագրողների հետ զրույցում ասաց Առողջապահության և սոցիալական հարցերի մշտական հանձնաժողովի նախագահ Նարեկ Զեյնալյանը։
«Կովիդով հիվանդների բուժօգոնությամբ այս պահին ներգրավված է շուրջ 20 բուժհաստատություն, այսօր կամ վաղը ևս երկուսը կմիանան»,- հայտնեց նա՝ հավելելով, որ այն դեպքերը, որոնք հոսպիտալացման կարիք չունեն, բուժօգնություն ստանում են տնային պայմաններում։
«Ինչպես ցանկացած վիրուս այս վիրուսը ևս շրջանառելու ընթացքում իր վարակելիությունը թուլանում է և այն դեպքերը, որոնք հոսպիտալացման կարիք ունեն, կամ ծանր դեպքերն ավելի պակաս են, քան առաջին ալիքի դեպքում»,- ընդգծեց Նարեկ Զեյնալյանը։
Հարցին, թե ռեսուրսները որքանո՞վ են բավարար, որպեսզի առողջապահական համակարգը կարողանա սպասերկել և՛ վիրավորներին, և՛ կովիդով վարակվածներին, Նարեկ Զեյնալյանն ասաց, որ այս պահին բժշկական անձնակազմի խնդիր չկա, բայց նա զգոնության կոչ արեց հանրությանը, որպեսզի համակարգը հավելյալ չծանրաբեռնվի։
Անդրադառնալով կովիդի դեմ պատվաստանյութի ստեղծմանը, Նարեկ Զեյնալյանն ասաց, որ այս պահին պատվաստանյութ չկա, որն ապացուցված է, որ մեծ արդյունավետություն կունենա։
Նարեկ Զեյնալյանի դիտարկմամբ՝ վիրուսը երբեք չի վերանալու երկրագնդի վրայից և պետք է համավարակի դեմ ամենօրյա ռեժիմով պայքարել և համավարակի պայմաններում սովորել ապրել։
«Եվ պատվաստանյութի առկայության դեպքում նաև օգտագործենք պատվաստանյութ․ սա է լուծումը։ Մենք չպիտի սպասենք, որ վիրուսը մեկ շաբաթից, մեկ ամսից, կամ մեկ տարուց վերանալու է և վարակակիր չենք ունենալու։ Նախկին համաճարակները՝ խոզի, թռչնի գրիպի վիրուսները չեն վերացել, հիմա էլ են մարդիկ վարակվում ենթադրենք՝ խոզի գրիպով»,- նշեց նա։
Ըստ Նարեկ Զեյնալյանի՝ բնակչության 40 տոկոսի և ավելիի դեպքում միայն կարելի է խոսել կոլեկտիվ իմունիտետի մասին։ Նրա համոզմամբ՝ եթե համաճարակային առումով իրավիճակը լարվեց, պետք է որոշ սահմանափակումներ մտցնել։
«Ի՞նչ սահմանափակումներ, ի՞նչ ժամկետով, դա կախված է համաճարակային իրավիճակից»,- ընդգծեց նա։
