ՌԴ ԱԳՆ ղեկավարը հերքել է լուրերն այն մասին, որ Թուրքիան մտադիր է համալրել ԵԱՀԿ ՄԽ շարքերը:
«Եռյակն ընդլայնելու ծրագրեր չկան»,-ասել է Լավրովն այսօր մամուլի ասուլիսի ժամանակ:
Մեկնաբանելով ԶԼՄ-ների տարբեր հրապարակումներն այն մասին, թե ով եւ ինչ է պարտվել, Լավրովը հայտարարել է, որ գնահատականներ շատ են. որ Ռուսաստանը պարտվել է, որ հաջորդը Ղրիմն է…«Վերլուծաբանների պակաս չկա: Թուրքիայում թերթերը մեղադրանքներ են հնչեցնում, որ Ռուսաստանը հաղթեց աշխարհում բոլորին, եւ որ Թուրքիան, իբր, հույս ուներ կապիտալիզացնել Ադրբեջանին տրամադրվող օգնությունը: Գրում են, որ թուրքերը հաղթում են մարտի դաշտում, իսկ ռուսները՝ բանակցությունների սեղանի շուրջ: Ես կարդացել եմ հատվածներ թուրքական մամուլից: Նույն ալիքն է, սակայն Ռուսաստանի հասցեին մեղադրանքներով: Այդ դիվանային վերլուծությանը պետք է քիչ ուշադրություն դարձնել»,-ասել է Լավրովը:
Իր խոսքերը պատկերավոր դարձնելու համար նա հայկական ռադիոյի մասին անեկդոտ է պատմել. «Հայկական ռադիոն պատասխանում էր հարցերին: Հարցերից մեկը հնչում էր մոտավորապես այսպես. ո՞րն է մարդկային օրգանիզմի որոշ հատվածների եւ կյանքի միջեւ տարբերությունը: Պատասխանն այսպես էր՝ կյանքն ավելի դաժան է: Այդ պատճառով այն քննարկումները, թե ով եւ ինչ է կորցրել, նույն շարքից են, երբ քաղաքականությունն ու աշխարհում տեղի ունեցող իրադարձություններն ընկալվում են հետեւյալ տեսանկյունից՝ «եթե ես հաղթել եմ, ուրեմն ես լավն եմ, ես եմ քեզ ստորացրել կամ էլ դու ինձ»»:
«Դա մեր քաղաքականությունը չէ: Մենք շահագրգիռ ենք, որպեսզի աշխարհում, առաջին հերթին մեր սահմանների մոտ խաղաղություն տիրի, որպեսզի հակամարտություններ չլինեն: Հայտարարում էին, որ Ռուսաստանը շահագրգիռ չէ, որ ԼՂ-ում հակամարտությունը կարգավորվի, որ Ռուսաստանն է երկար տարիներ ձգձգել: Դա բացարձակ սուտ է: Ռուսաստանն առաջինն է ձգտել կարգավորել այն, ինչի օրինակ է Կազանի փաստաթուղթը, որը կարող էր նույն արդյունքը տալ,սակայն առանց արյունահեղության: Ցավոք, այդ ժամանակ դա անհնար էր, սակայն ոչ մեր մեղքով: Դրանից հետո մենք առաջ քաշեցինք երկփուլային մոտեցում, որը եւս սկզբում ընդունվեց ոգեւորությամբ, սակայն հետո կասկածներ առաջացան՝ 5 շրջան, 2 շրջան, իսկ ինչպե՞ս է անվտանգությունն ապահովվելու: Դա հետաձգվեց ոչ մեր մեղքով: Այժմ խնդիրը կարգավորվում է, ցավոք, ուժի կիրառման եւ երկու կողմերից զոհերի գնով: Պատմությունը ոչինչ չի սովորեցնում, սակայն վիրավորական է, որ արդյունքի ես հասնում արյան գնով, հնարավոր էր արդյունքի հասնել առանց դրա»,-հավելել է Լավրովը: