Թուրքիայի արտգործնախարար Ահմեդ Դավութօղլուն համառորեն հրաժարվում է արգելել Թուրքիայում նախապատրաստվող «Մավի Մարմարա» նավատորմի երկրորդ նավարկությանը դեպի Գազայի հատված։
Թուրքիայի արտգործնախարարը «Ռոյթերս»-ի հետ հարցազրույցի ընթացքում հայտարարել է, թե ժողովրդավարական երկրներում ոչ ոք չի կարող սահմանափակել հասարակական կազմակերպությունների գործունեությունը։ «Մենք իրավունք չունենք արգելք հանդիսանալ այն մարդկանց, ովքեր դեմ են օրենքից դուրս շրջափակմանը։ Այս խնդրում պատասխանատվությունն ընկած է Իսրայելի ուսերին»,-ասել է Դավութօղլուն՝ կրկին կոչ անելով Իսրայելին՝ ներողություն խնդրել նախորդ տարի սպանված 9 քաղաքացիների սպանությունների համար։
Նշենք, որ 2010-ի մայիսի 31-ին Իսրայելական զինված ուժերը գրոհով վերցրել են Գազայի հատված օգնություն տանող թուրքական նավեր։
Գործողությունների ընթացքում «Մավի Մարմարա» նավի վրա սպանվել էր Թուրքիայի 8 քաղաքացի եւ ազգությամբ թուրք 1 ԱՄՆ քաղաքացի։