Իսրայելի պաշտպանության ուժերին հանձնարարվել է նախապատրաստվել Իրանի դեմ ԱՄՆ ռազմական հարվածի հնարավորությանը նախքան նախագահ Դոնալդ Թրամփի պաշտոնը թողնելը: Այս մասին հայտնում է Axios-ը` վկայակոչելով իսրայելական բարձրաստիճան պաշտոնյաներին:
Իսրայելի կառավարությունը հրահանգել է Իսրայելի Պաշտպանության ուժերին գործողություններ ձեռնարկել` ոչ թե հիմնվելով ինչ-որ հետախուզական տվյալների վրա այն մասին, որ Թրամփը կհրամայի նման հարված հասցնել, այլ` հունվարի 20-ին Բայդենի երդմնակալությունից առաջ «շատ զգայուն ժամանակաշրջանի» սպասման կապակցությամբ:
Իսրայելի պաշտոնյաները նշում են, որ Իսրայելի ՊԲ-ի պատրաստվածության միջոցառումները կապված են Իրանի կողմից ուղիղ կամ Սիրիայում, Գազայում եւ Լիբանանում իրանական վստահված անձանց միջոցով հնարավոր պատասխան հարվածի հետ Իսրայելին:
Անցյալ շաբաթ New York Times- ը հաղորդել էր, որ Թրամփն ազգային անվտանգության իր թիմի բարձրաստիճան անդամների հետ հանդիպման ժամանակ բարձրացրել է Նաթանզում ուրանի հարստացման իրանական օբյեկտի վրա հարձակման հնարավորության հարցը: Այս մասին նա հայտարարել էր Իրանում հարստացված ուրանի պաշարների աճի վերաբերյալ ՄԱԳԱՏԷ-ի զեկույցից հետո, սակայն բարձրաստիճան պաշտոնյաները, այդ թվում` փոխնախագահ Մայք Փենսը եւ պետքարտուղար Մայք Պոմպեոն, նախազգուշացրեցին տարածաշրջանային սրման ռիսկերի մասին: Թվում էր` Թրամփին համոզել էին, որ ուղիղ հարվածն Իրանին չափազանց ռիսկային կլինի, սակայն նա այլ տարբերակներ է դիտարկում, գրել էր Times-ը:
Վերջին երկու շաբաթվա ընթացքում Իսրայելի պաշտպանության նախարար Բենի Հանցը երկու անգամ զրուցել է պաշտպանության նախարարի պաշտոնակատար Քրիստոֆեր Միլլերի հետ: Նրանք քննարկել են Իրանը, ինչպես նաեւ Սիրիան եւ համագործակցությունը պաշտպանության ոլորտում: Անցյալ կիրակի Իսրայելի վարչապետ Բենյամին Նեթանյահուն Սաուդյան Արաբիայում հանդիպեց թագաժառանգ արքայազն Մուհամեդ բին Սալմանի հետ: Իսրայելցի պաշտոնյաները նշում են, որ քննարկված հիմնական հարցերից մեկն Իրանն էր:
Անցյալ կիրակի Պոմպեոն Իրանը քննարկելու համար այցելել էր Իսրայել եւ Պարսից ծոցի մի քանի երկիր: Պետդեպարտամենտի` Պոմպեոյի հետ ճանապարհորդած պաշտոնյաները լրագրողներին հայտնել են, որ «բոլոր տարբերակները սեղանի վրա են»:
Մինչ Պոմպեոն Պարսից ծոցում էր, ԱՄՆ կենտրոնական հրամանատարությունը հայտարարել էր, որ Բ-52 ռազմավարական ռմբակոծիչները «կարճաժամկետ եւ հեռահար առաքելություն են իրականացրել դեպի Մերձավոր Արեւելք` ագրեսիան զսպելու եւ ամերիկացի գործընկերներին եւ դաշնակիցներին հանգստացնելու համար»: Սա որպես Իրանին ուղղված եւս մի ազդանշան ընկալվեց:
Իրանի առաջնորդի խորհրդական, Իրանի առաջիկա նախագահական ընտրություններում հավանական թեկնածու Հոսեյն Դեհգանը նախորդ շաբաթ AP-ին հայտարարել էր, որ ԱՄՆ-ի ռազմական հարվածն Իրանին կարող է «լայնամասշտաբ պատերազմ» հրահրել Մերձավոր Արեւելքում:
Իսրայելցի բարձրաստիճան պաշտոնյաները հայտարարել են, որ Իսրայելը նախապես կծանուցվի ԱՄՆ-ի կողմից Իրանին հարված հասցնելու դեպքում: Բայց նրանք մտահոգված են, որ դա բավարար չի լինի լիարժեք պատրաստվելու համար: Այսպիսով, Իսրայելի ՊԲ-ի կողմից նախապատրաստական աշխատանքներ սկսելու հրամանն արվել է` հաշվի առնելով, որ այդպիսի սցենար հնարավոր է:
