Մենք կոնսուլտացիաներ ենք ունեցել 16 ուժերի համակարգող մարմնի ներկայացուցչի հետ, եւ մեզ իրազեկվել է, որ 16 ուժերը որոշում են կայացրել առաջադրել Վազգեն Մանուկյանի թեկնածությունը՝ որպես իրենց միասնական թեկնածու։ Այս մասին այսօր՝ դեկտեմբերի 6-ին, խորհրդարանական լսումների ժմանակ հայտարարեց «Լուսավոր Հայաստան» խմբակցության ղեկավար Էդմոն Մարուքյանը։
«Շատ հարգանքով ենք մոտենում ցանկացած ուժի՝ վարչապետի թեկնածու ունենալու իրավունքին, եւ մենք էլ իրազեկել ենք, որ մենք՝ որպես խորհրդարանական ուժ, վարչապետի թեկնածուով ենք ընտրություններին մասնակցել, եւ հետեւաբար մենք ունենք վարչապետի թեկնածու։ Դրանից հետո հարգանքով իրարից բաժանվել ենք»,-ասաց պատգամավորը՝ նշելով, թե, բնականաբար, լինելու է հանդիպում Վազգեն Մանուկյանի հետ:
«Կա նման նախաձեռնություն, պետք է հանդիպենք, կխոսենք, կշփվենք, ես կարծում եմ, որ որեւէ ձեւով, առումով մենք չպետք է ասենք՝ ամենաճիշտը իմն է, պետք է այսպես անեմ, այլապես չի ստացվի միասնական որեւէ որոշում, որեւէ շարժում, այդ թվում՝ «Իմ քայլը» դաշինքի հետ, հետեւաբար, երբ կհանդիպենք պարոն Մանուկյանի հետ, ինքն իր մոտեցումները կներկայացնի, մենք մեր մոտեցումները կներկայացնենք, կքննարկենք»,-հայտարարեց Էդմոն Մարուքյանը։