Իրենց տները հարկադիր լքած մարդկանց թիվը, այդ թվում՝ զինված հակամարտությունների եւ հետապնդումների հետեւանքով, աշխարհում 80 միլիոնից անցել է: Այս տվյալները ներկայացված են Ժնեւում հրապարակված ՄԱԿ Փախստականների հարցերով գերագույն հանձնակատարի վարչության զեկույցում, փոխանցում է ՏԱՍՍ-ը:
«Ըստ Վարչության գնահատականների՝ ընթացիկ տարվա կեսին աշխարհում հարկադիր տեղահանված անձանց թիվը 80 միլիոնից անցել է»,- նշում են գերատեսչությունից:
«Այս տարվա սկզբին աշխարհում կար գրեթե 79,5 մլն մարդ, որոնք իրենց տները հարկադրված լքել էին հետապնդումների, հակամարտությունների եւ մարդու իրավունքների խախտումների պատճառով»,- նշված է զեկույցում: Այս թվի մեջ են ներառվում 45,7 մլն ներքին տեղահանվածները, 29,6 մլն փախստականները եւ 4,2 մլն ապաստան հայցողները: Փորձագետները նշում են, որ մի շարք երկրներում եւ տարածաշրջաններում, ներառյալ Սիրիայում, Կոնգոյում, Սոմալիում եւ Եմենում, բռնությունը հանգեցրել է բնակչության նոր տեղահանումների:
Կորոնավիրուսը լրացուցիչ դժվարություններ է ստեղծել հայրենի վայրերը ստիպված լքած մարդկանց համար, նշում են վարչությունից: Համավարակի թեժ պահին՝ ապրիլին, 168 երկրներ ամբողջությամբ կամ մասնակի փակել էին իրենց սահմանները: Ընդ որում՝ 90 երկրներ ոչ մի բացառություն չէին արել ապաստան փնտրողների համար: 2020 թվականի առաջին վեց ամիսներին հայրենիք է վերադարձել 22 տոկոսով ավելի քիչ փախստական, քան անցյալ տարվա նույն ժամանակահատվածում, իսկ ապաստան ստանալու հայտերի թիվը մեկ երրորդով կրճատվել է:
Փախստականների հարցերով գերագույն հանձնակատարի վարչության 79 երկրներից ստացած տեղեկությունների համաձայն՝ 2020 թվականի կեսի դրությամբ աշխարհում կա 4,2 մլն քաղաքացիություն չունեցող անձ:
