ՌԴ Քննչական կոմիտեի փոխնախագահ Ռոստիսլավ Ռասսոխովը «Կոմերսանտ»-ի հետ զրույցում նշել է «օրենքով գող» Վյաչեսլավ Իվանկովի (Յապոնչիկ) սպանության դրդապատճառը, հաղորդում է «ՌԻԱ Նովոստի»-ն:
«Իվանկովի սպանության հիմնական դրդապատճառը հանցագործության կազմակերպիչ, «օրենքով գող» Իլյա Սիմոնիայի (Մախո) անձնական թշնամանքն էր նրա հանդեպ»,-ասել է նա:
Ռասսոխովի խոսքով՝ երկու քրեական հեղինակությունների միջեւ կոնֆլիկտը սկսվել է դեռեւս 1980-ական թվականներին, երբ նրանք պատիժ էին կրում Իրկուտսկի մարզի գաղութներում:
Նա հավելել է, որ տաք հետքերով սպանությունը բացահայտել չեն կարողացել տեխնիկական միջոցների պակասի պատճառով: Կասկածյալների հետքի վրա դուրս գալը հնարավոր է եղել ավելի ուշ՝ շնորհիվ կրիմինալիստիկայի ժամանակակից միջոցների:
2009 թվականի հունիսի վերջին Իվանկովին ծանր վնասվածք էր հասցրել դիպուկահարը, երբ նա դուրս էր գալիս Մոսկվայի Խորոշեվսկի մայրուղու վրա գտնվող «Թայական փիղ» ռեստորանից: Մի քանի ամիս անց քրեական հեղինակությունը մահացել է:
2020 թվականի փետրվարին դատարանը կալանավորել է գործով մեղադրյալներից մեկին՝ Մուրտազ Շադանիային, ապրիլին՝ հեռակա կարգով ձերբակալել է սպանության ենթադրյալ կազմակերպիչ Իլյա Սիմոնիային, ում նկատմամբ միջազգային հետախուզում է հայտարարվել: Մայիսին կալանավորվել է Ջամբուլա Ջանաշիան, ով, քննության վարկածով, սպանության օրը եղել է հանցանքի վայրում եւ ապահովել կապը սպանության կազմակերպիչների հետ:
Սպանության եւս մեկ մասնակից է բազմիցս դատապարտված Կախա Գազաեւը, ով 2017 թվականից պատիժ է կրում մեկ այլ հանցանքի համար:
