Դավաճան Նիկոլի հրամանով մեր ընկերներից մի քանի հարյուրին բերման են ենթարկել ոստիկանության բաժիններ. դանով Նիկոլ Փաշինյանը փորձում է ջլատել մեր պայքարը, բայց նրա մոտ դա չի ստացվելու, մենք անդրդվելի ենք եւ անպայման հաղթելու ենք: Այս մասին այսօր՝ դեկտեմբերի 11-ին, Ֆրանսիայի հրապարակում բողոքի ակցիայի ժամանակ հայտարարեց «Հայրենիք» կուսակցության ղեկավար Արթուր Վանեցյանը:
Նրա խոսքով, այս պահին ոստիկանության բաժնում են գտնվում ՀՅԴ ներկայացուցիչ Իշխան Սաղաթելյանը եւ իրենց մյուս ընկերները:
«Մեր այսօրվա երթը ունի երկու խորհուրդ՝ միացում եւ երկրորդը՝ անպայման հաղթելու ենք եւ ունենալու ենք երկիր առանց դավաճան իշխանությունները»,-ասաց Վանեցյանը:
Նա կոչ արեց հեռուստացույցներով եւ հեռախոսներով իրենց ակցիաներին հետեւող մարդկանց դուրս գալ փողոց, միանալ իրենց. «Ամենօրյա ռեժիմով պետք է իրականացնենք մեր ակցիաները եւ հասնենք արդյունքի: Կոչ եմ ուղղում իրավապահներին. «Տղերք, ես ձեզանից մեկն եմ, ինձ համար անսովոր է այս կարգավիճակը, բայց պետք է հասկանանք, որ ՀՀ փրկության համար, մեր երեխաների համար պետք է ցանկացած պահի պատրաստ լինենք պայքարել այս դավաճան իշխանությունների դեմ»,-ասաց նա:
Վանեցյանը հավելեց, որ վաղվանից շարունակելու են իրենց բողոքի ակցիաները, ոչ մի պահ կանգ չեն առնելու:
Նշենք, որ քաղաքացիները Նիկոլ Փաշինյանի հրաժարականի պահանջով բողոքի ակցիաներ են իրականացնում Երեւանի տարբեր հատվածներում: Նրանք «արժանապատվության երթով» շարժվել են դեպի Ֆրանսիայի հրապարակ՝ վանկարկելով «Նիկոլ դավաճան»:
Ակցիայի բազմաթիվ մասնակիցների ոստիկանները բերման են ենթարկել:
