Սյունիքի մարզի Կապան քաղաքի բոլոր դիրքերը ադրբեջանական կողմին հանձնելուց առաջ, այսօր՝ դեկտեմբերի 18-ին, քաղաքացիները այրում էին սահմանից այն կողմ մնացող իրենց տներն ու գոմերը։ NEWS.am-ի թղթակիցը հաղորդում է, որ մինչեւ ժամը 17։00-ն քաղաքացիները, որոնց տները հանձնվող Քաշաթաղի շրջանի՝ Կապանին սահմանակից գյուղում էին, դուրս էին բերում իրենց իրերը։ Բացի այդ, կապանցիները այրում էին սահմանով անցնող իրենց շինությունները, դրանցից մեկը, օրինակ, հենց Կապանի օդանավակայանի հարեւանությամբ։
NEWS.am-ի թղթակիցը հաղորդում է, որ ժամը 17։ 00-ի դրությամբ, հայ դիրքապահներն արդեն դուրս էին եկել Կապանի մոտ գտնվող դիրքերից։ Նրանք, ավելի քան 10 կմ ստիպված են եղել նահանջել։ Տեղացիները NEWS.am-ին պատմեցին, որ Կապան քաղաքը, եւ օրինակ, Սյունիք գյուղը ամբողջությամբ հայտնվում է հակառակորդի դիտակետում, քանի որ հակառակորդին են հանձնվում այդ տարածքի ամենաբարձր կետերը։
Նշենք, որ սահմանն անմիջապես անցնում է Կապանի օդանավակայանի հարեւանությամբ։ Ադրբեջանին են հանձնվում այդտեղ գտնվող բարձունքները։ Դիտակետում է հայտնվում նաեւ Կապան-Գորիս գլխավոր ավտոճանապարհը։