ԱՄՆ պետքարտուղար Մայքլ Պոմպեոն կդիտարկի Կուբան ահաբեկչության հովանավորների ամերիկյան ցուցակում ներառելու հնարավորությունը, հաղորդում է ՏԱՍՍ-ը` վկայակոչելով The New York Times-ը:
Ըստ պարբերականի աղբյուրների` «Պետդեպարտամենտի պաշտոնյաներն առաջարկ են նախապատրաստել»` Կուբան ցուցակում ներառելու համար: Պոմպեոն «պետք է որոշի` հաստատել նախագիծը, թե ոչ»: Դեռ պարզ չէ, թե ինչպես նա կվարվի:
Պարբերականն արձանագրում է, որ այս քայլը «Կուբայի իշխանությունների դեմ ԱՄՆ պատժամիջոցների ավտոմատ կիրառման կհանգեցնի» եւ կդժվարացնի հանրապետության հետ հարաբերությունների կարգավորումն ԱՄՆ ընտրված նախագահի Ջոզեֆ Բայդենի համար: Դեմոկրատի երդմնակալության արարողությունը տեղի կունենա 2021 թվականի հունվարի 20-ին: Բայդենը պաշտոնը ստանձնելուց հետո կարող է բացառել Կուբան նշված ցուցակից, սակայն մինչ այդ պետք է տեղի ունենա այս ցուցակի վերանայման ընթացակարգը: Ըստ թերթի` «այս գործընթացը կարող է մի քանի ամիս տեւել»:
Սպիտակ տանը եւ Պետդեպարտամենտում հրապարակման ներկայացրած պնդումները չեն հաստատել: Ներկայումս Վաշինգտոնը կարծում է, որ ահաբեկչության հովանավոր պետությունների ցուցակում են Իրանը, Հյուսիսային Կորեան եւ Սիրիան:
ԱՄՆ-ն խզել է դիվանագիտական կապերը Կուբայի հետ 1961 թվականին` ի պատասխան ամերիկյան ունեցվածքի ազգայնացմանը կղզու վրա: Դրանից հետո Վաշինգտոնը հայտարարել էր երկրի դեմ առեւտրատնտեսական էմբարգոյի սահմանման մասին: 2014-ի դեկտեմբերին այն ժամանակ Միացյալ Նահանգների նախագահ Բարաք Օբաման, խոստովանել էր, որ Հավանայի նկատմամբ Վաշինգտոնի նախկին քաղաքականությունը չի աշխատում, եւ հայտարարել էր երկկողմ կապերի կարգավորման եւ հակակուբական պատժամիջոցները մեղմելու ուղղությամբ աշխատանքների մեկնարկի մասին: 2015 թվականին Օբամայի վարչակազմը հայտարարել էր Կուբան ահաբեկչության հովանավորող պետությունների ԱՄՆ ցուցակից բացառելու մասին:
Երկու երկրների մերձեցումը կանգ էր առել 2017-ի հունվարին հանրապետական Դոնալդ Թրամփի` Միացյալ Նահանգների նախագահի պաշտոնը ստանձնելու հետո: Նա խստացրեց հայրենակիցների` հանրապետություն մեկնելու կանոնները եւ արգելեց բիզնես վարել կուբայական բանակի վերահսկողության տակ գտնվող կազմակերպությունների հետ: Բայդենը քննադատում էր Թրամփի քաղաքականությունը Հավանայի նկատմամբ:
