ՄԱԿ-ում ԱՄՆ մշտական ներկայացուցիչ Քելի Քրաֆթը քննադատել է Գլխավոր ասամբլեայի կողմից հաստատված կազմակերպության 2021 թվականի բյուջեն՝ հայտարարելով, որ ֆինանսավորումը կուղղվի «հակասեմականության խայտառակ ժառանգության տարածմանը», հաղորդում է «ՌԻԱ Նովոստին»:
Հինգշաբթի օրը ՄԱԿ անդամ-երկրները հաստատել են 3,2 միլիարդ ԱՄՆ դոլարի բյուջեն, որը հաշվարկված է 2021 թվականին կազմակերպության գործունեությունը ֆինանսավորելու համար: Սակայն ԱՄՆ-ը դեմ է արտահայտվել բյուջեին, մասնավորապես՝ հրաժարվելով ֆինանսավորել Հարավային Աֆրիկայում Ռասիզմի եւ ռասայական խտրականության, այլատյացության եւ հարակից անհանդուրժողականության դեմ համաշխարհային գիտաժողովի Դուրբանի հռչակագրի ընդունման կապակցությամբ միջոցառումը:
«Քսան տարի անց (կարելի է արձանագրել, որ) Դուրբանի հռչակագրում գովելի ոչինչ չկա... Այն թունավորված է հակասեմականությամբ եւ հակաիսրայելական կողմնակալությամբ»,- ասվում է Քրաֆթի հայտարարության մեջ:
Նրա խոսքով՝ ընդունելով ՄԱԿ-ի բյուջեն, երկրները գնում են «զիջման, որը տարածում է ատելության, հակասեմականության եւ հակաիսրայելական կողմնակալության խայտառակ ժառանգությունը»:
«ԱՄՆ-ը եղել եւ մնում է ՄԱԿ-ի ամենամեծ եւ ամենահուսալի գործընկերը, եւ այդ պարտավորությունը փոփոխություն չի կրի: Մենք նույնպես երբեւէ չենք աջակցի Դուրբանի գործընթացին, որն ուղղված է պառակտմանը, ոչ թե միավորմանը: ԱՄՆ հարկատուների ռեսուրսները պետք է ծախսվեն խելամտորեն, արդյունավետ եւ ամերիկյան շահերին համապատասխան»,- Twitter-ում գրել է մշտական ներկայացուցիչը:
Կազմակերպության բյուջեն ընդունվել է մեծամասնության կողմից՝ չնայած ԱՄՆ-ի եւ Իսրայելի «դեմ» ձայներին: