Անցյալ տարվա հունվար-սեպտեմբերին Հայաստանում իրականացվել է ընդհանուր 327 հազար տուրիստական այց, ամբողջ 2020 թվականին՝ առավելագույնը 350 հազար այց, ինչը ավելի քան 1 մլն այցով քիչ է 2019 թվականի ցուցանիշից: Այս մասին հունվարի 13-ին լրագրողների հետ հանդիպմանն ասաց Հայաստանի Տուրիզմի ֆեդերացիայի նախագահ Մեխակ Ապրեսյանը:
Նա պարզաբանեց, որ մեկ տարում ներգնա տուրիզմի ոլորտում անկումը կազմել է շուրջ 80 տոկոս: «2020 թվականի առաջին 9 ամիսներին Հայաստանում, 2019 թվականի նույն ժամանակահատվածի համեմատությամբ, ներգնա տուրիզմը կրճատվել է 77,5 տոկոսով: Արտագնա տուրիզմը կրճատվել է 78,2 տոկոսով: Ներքին տուրիզմի ոլորտում, որքան էլ տարօրինակ է, նույնպես անկում է գրանցվել՝ 33,5 տոկոսով (առաջին 9 ամիսներին)»,- նշեց Ապրեսյանը:
Փորձագետը շեշտեց, որ 2020 թվականի առաջին 10 ամիսներին ամբողջ աշխարհում տուրիստական այցելությունները կրճատվել են 72 տոկոսով, այսինքն՝ 900 մլն այցով պակաս, քան 2019 թվականին, իսկ ամբողջ 2020 թվականին անկումը կազմել է 75 տոկոս, այսինքն՝ 1 մլրդ այցով պակաս, քան նախորդ տարի:
