Պատերազմից հետո Սփյուռքի հետ աշխատանքը բարդացել է։ Այս մասին այսօր՝ հունվարի 14-ին, լրագրողներին ասաց Սփյուռքի գործերով գլխավոր հանձնակատար Զարեհ Սինանյանը՝ անդրադառնալով Սփյուռքի տրամադրություններին։
«Այս պատերազմից հետո բոլորի մոտ հոգեբանական շոկային իրավիճակ է, ինչի արդյունքում պատերազմից հետո Սփյուռքի հետ աշխատանքը բարդացել է»,- նշեց նա։
Ըստ Սինանյանի՝ Սփյուռքում մամուլի մեծամասնությունը վերահսկվում է նախորդ ռեժիմի հետ առնչվող ուժերի կողմից, եւ այդ ուժերը ներկայացնում են իրենց այլընտրանքային իրականությունը. «Օրինակ՝ եթե դուք ապրում եք Լոս Անջելեսում, կարող է տպավորություն ստեղծվել, թե Հայաստանում տեղի ունեցան մասսայական ցույցեր, բայց մենք գիտենք, որ դա իրականությունից շատ հեռու է»։
Հարցին՝ արդյոք Սինանյանը հավատո՞ւմ էր, որ մենք պատերազմում հաղթելու ենք, Սինանյանն ասաց. «Ներքին տեղեկատվություն ես չեմ ստացել, բաց տեղեկատվական կայքերից հասկացել եմ, որ մեր գործերը լավ չեն, բայց չիեմ պատկերացրել, որ իրավիճակն այդքան վատ է: Մարդիկ շոկի մեջ են, մարդիկ պատասխաններ են փնտրում, մարդիկ ուզում են հասկանան՝ ոնց եղավ, չնայած պատասխաններն, իմ կարծիքով, պարզ են:
Անդրադառնալով «Հայաստան» համահայկական հիմնադրամի շուրջ ստեղծված աղմուկի մասին Սինանյանն ասաց, որ այդ քննարկումները վնասելու են հիմնադրամի հեղինակությանը, եթե բացատրական աշխատանք չտարվի, թե գումարներն ինչ նպատակով են օգտագործվում եւ ինչքանով են համընկնում այն նպատակների հետ, որոնց համար հավաքվել են։
Հարցին՝ Հայաստանում տեղի ունեցող ներքաղաքական եւ հետպատերազմյան շրջանում արդյոք Սփյուռքից Հայաստան ներդրումները սառեցվե՞լ են, Սինանյանը հայտնեց, որ չեն սառեցվել։
Անդրադառնալով իր աղմկահարույց այն գրառմանը, թե եթե չեք ուզում երեխա ունենալ եւ ապրել հայրենիքում, այլազգիները դա կանեն, Սինանյանը պարզաբանեց, որ դա ընդամենը կոչ է հայ ժողովրդին. «Այն մարդիկ, որոնք որ գալու են մեզ հաղթեն, քանի որ մենք անպաշտպան երկիր ենք ունենալու, քանի որ բնակչություն չենք ունենալու, հաղթելու ու հողին տիրանալու են ինչպես տիրացել են մեր հայրենիքի 9/10-րդին։ Հետեւաբար դա կոչ է ողջ հայ ժողովրդին՝ ապրել հայրենիքում եւ երեխաներ ունենալ»։
