ՀՀ կառավարությունը ձեռնարկել է բոլոր կարեւոր գործընթացներն ու քայլերը գերիներին վերադարձնելու համար: Այս մասին ԱԺ նիստում ասաց ՀՀ արդարադատության նախարար Ռուստամ Բադասյանը՝ պատասխանելով Ադրբեջանում ապօրինաբար պահվող հայ ռազմագերիների ճակատագրի հետ կապված «Լուսավոր Հայաստան» կուսակցության պատգամավոր Տարոն Սիմոնյանի հարցին:
Նախարարի խոսքով՝ Հայաստանում մշտապես քննարկումներ են ընթանում, հայտարարություններ հնչեցվում, որոնք նպատակ ունեն թերագնահատել այդ գործընթացում կառավարության դերը:
«Քարոզչություն է ընթանում, թե, իբր, կառավարությունն անգործ է եւ նախաձեռնությամբ հանդես չի գալիս: Այն դեպքում, երբ բոլոր անհրաժեշտ քայլերը ձեռնարկվում են»,-վստահեցրեց Բադասյանը: