Արտահերթ խորհրդարանական ընտրությունների անցկացումը Հայաստանի իշխանությունների համար ինքնանպատակ չէ: Այս մասին հունվարի 21-ին Ազգային ժողովում ավանդական ճեպազրույցների ժամանակ ասաց իշխող «Իմ քայլը» դաշինքի պատգամավոր Սուրեն Գրիգորյանը:
Քաղաքական գործչի խոսքով՝ հուշագրի ստորագրումը պետք է դրա վկայությունը դառնա: Նա կոչ արեց ստեղծված իրավիճակին եւ այս առաջարկին ըմբռնումով վերաբերվել: «Ինձ համար հասկանալի չեն մեր գործընկեր խորհրդարանականների մեկնաբանությունները, որովհետեւ այս ամբողջ երկու տարվա ընթացքում գանգատվում էին, որ իրենց կարծիքին ուշադրություն չի դարձվում, եւ որ խորհրդարանական մեծամասնությունը այդ որոշումներն ընդունում է միանձնյա: Հիմա ասում ենք, որ չենք ցանկանում այդ որոշումները միայնակ ընդունել, ցանկանում ենք դրանք միասին ընդունել, որ միասին հասկանանք, թե ինչպես լուծենք տվյալ կոնկրետ իրավիճակում առաջացած խնդիրը»,- ասաց պատգամավորը: