Ինչպես այլ մտքերը, այնպես էլ գերիներին վերադարձնելու կապակցությամբ վարչապետի կարծիքը փորձում են հանրությանը ներկայացնել այլ երանգներով: Այս մասին հունվարի 21-ին Ազգային ժողովում ավանդական ճեպազրույցների ժամանակ ասաց իշխող «Իմ քայլը» դաշինքի պատգամավոր Նազելի Բաղդասարյանը:
Նրա խոսքով՝ հայկական կողմում դեռեւս երբեք այսքան գերիներ եւ պահվող անձինք չեն եղել: «Տրամանաբանական է, որ այս դեպքում խոսքը ոչ թե գերիների թվի, այլ նրանց հայրենիք վերադարձնելու գործընթացի տեւողության մասին էր: Վարչապետը հենց դա էր ուզում շեշտել իր երեկվա ելույթում: Այո, իսկապես, մեզ մոտ դեռեւս երբեք այսքան գերիներ տուն չեն վերադարձել»,- ասաց Բաղդասարյանը:
Նա նշեց, որ որոշակի քաղաքական պայմանավորվածությունների արդյունքում եւ իրավական պլատֆորմի հաշվին մեխանիզմներ են ստեղծվել, որոնց մասին առայժմ ոչ մի բան չի հրապարակվում: Այդուհանդերձ, նա հավաստիացրեց, որ ռազմագերիներին վերադարձնելու հետեւողական գործընթացը շարունակում է իրականացվել:
Հիշեցնենք, որ վարչապետը երեկ խորհրդարանի ամբիոնից ելույթ ունենալիս կատարել էր մի շարք օդիոզ հայտարարություններ: Նա, մասնավորապես, հայտարարել էր, որ վերջին մի քանի տարիներին երբեք Հայաստան չեն վերադարձվել այդքան մեծ թվով գերիներ, ինչպես իր իշխանավարման ժամանակ: Վարչապետի խոսքով՝ այս բոլոր տարիներին Ադրբեջանում եղել են Հայաստանից գերիներ, սակայն նրա համար անհասկանալի պատճառներով այդ հարցը երբեք չի դարձել խորհրդարանական ընդդիմության կողմից ԱԺ-ում քննարկման թեմա: «Ադրբեջանի հետ տարբեր ձեւաչափերով բանակցություններ են վարվել, այդ ժամանակ նրա տարածքում գերիներ են եղել: Բայց ինչո՞ւ ոչ մեկը չի պահանջել իշխանությունների հրաժարականը»,- հարց է տվել Փաշինյանը՝ հավասարության նշան դնելով միավորների եւ հարյուրավոր գերիների միջեւ:
