Կիրակի Իրանի ԱԳ նախարար Մոհամադ Ջավադ Զարիֆը հանդիպել է «Թալիբան» շարժման պատվիրակության հետ, որի ընթացքում պատրաստակամություն է հայտնել Իրանի կողմից աջակցել «Թալիբանի» եւ Աֆղանստանի կառավարության միջեւ բանակցություններին, հաղորդում է Mehr-ը:
Հանդիպման ընթացքում Զարիվը գոհունակություն է հայտնել Աֆղանստանի բոլոր էթնիկ եւ քաղաքական խմբերի մասնակցությամբ համապարփակ կառավարություն ձեւավորելու գաղափարի շուրջ:
«Քաղաքական որոշումները չեն կարող ընդունվել վակուումի պայմաններում, իսկ համապարփակ կառավարության ձեւավորումը պետք է տեղի ունենա լայն մասնակցության վրա հիմնված գործընթացի շրջանակում՝ հաշվի առնելով հիմնարար կառույցները, ինստիտուտներն ու օրենքները, ինչպիսին է սահմանադրությունը»,-ասել է նա:
Ինչպես հաղորդում է «Թալիբանի» մամուլի ծառայությունը, հանդիպման ընթացքում քննարկվել է իրավիճակն Աֆղանստանում, միջաֆղանական բանակցությունները, Դոհայում համաձայնագրի լիարժեք կատարումն ու Աֆղանստանում եւ տարածաշրջանում խաղաղության ու անվտանգության լիարժեք ապահովումը:
