Սահմանների պաշտոնական բացման եւ Հայաստանի, Թուրքիայի եւ Ադրբեջանի միջեւ փոխադարձ առեւտրի ապահովման հնարավորության ի հայտ գալու հարցը չափազանց շատ է տարատեսակ մանիպուլյացիաների ենթարկվել: Այս մասին փետրվարի 12-ին ավանդական ճեպազրույցների ժամանակ ասաց իշխող «Իմ քայլը» դաշինքի պատգամավոր Հայկ Գեւորգյանը` պատասխանելով հնարավոր ռիսկերի մասին հարցին իրավիճակի նման զարգացման դեպքում:
Պատգամավորի խոսքով` Հայաստանի եւ Թուրքիայի միջեւ արդեն այսօր էլ փոխադարձ առեւտուր է իրականացվում:
«Անկախ նրանից` մենք դիվանագիտական հարաբերություններ ունենք, թե ոչ, ինչպես ենք վերաբերվում այդ երկրին, այսօր այդպիսի առեւտուր իրականացվում է»,- ասաց Գեւորգյանը:
Իսկ ինչ վերաբերում է նրան, թե ինչ կարող է տեղի ունենալ, եթե սահմանները պաշտոնապես բացվեն, ապա, ինչպես նշեց խորհրդարանականը, նախ եւ առաջ պետք է նշել, որ Հայաստանը ԵԱՏՄ անդամ է եւ Հայաստանի սահմանները նաեւ ԵԱՏՄ սահմաններն են, ուստի Հայաստանի հետ սահմանը հատելիս թուրքական ապրանքները պետք է բախվեն ԵԱՏՄ խոչընդոտներին եւ մաքսային սահմանափակումներին:
Իր հերթին, «Իմ քայլի» մեկ այլ պատգամավոր` Սիսակ Գաբրիելյանը, հայտարարեց, որ այս պահին Հայաստանի, Ռուսաստանի եւ Ադրբեջանի միջեւ բանակցությունները չեն շոշափում ոչ Թուրքիայի, ոչ էլ Ադրբեջանի հետ առեւտրի հարցը: