Քվեշեթի-Քոբի տեղամասում տրանսպորտային անխոչընդոտ հաղորդակցության ապահովման համար ճանապարհի եւ թունելի շինարարությունը կսկսվի գարնանը, հայտարարել է ենթակառուցվածքների նախարար Մայա Ցկիտիշվիլին:
Վրաստանի իշխանությունները ծրագրում են նոր ճանապարհն ու թունելը կառուցել Քվեշեթի-Քոբի տեղամասում՝ սա Քոբի-Գուդաուրի տեղամասի շրջանցիկ ճանապարհն է, որտեղ ձմեռվա շրջանում հաճախ ձնահուսի վտանգ է առաջանում, ինչի հետեւանքով ճանապարհը փակվում է: Վրաստանն ու Ռուսաստանը կապող Ռազմավիրական ճանապարհին թունելի կառուցումը հայ փոխադրողներին թույլ կտա այլեւս օրերով չխցանվել «Վերին Լարս» անցակետում:
«Քվեշեթի-Քոբի 9 կիլոմետրանոց թունելի համար 15 մետր տրամագծով հորատման սարքն արդեն Վրաստանում է, եւ գարնանից կսկսվի ինչպես ճանապարհի, այնպես էլ թունելի շինարարությունը»,- ասել է Ցկիտիշվիլին:
Նախագծով նախատեսված է 22,7 կմ երակարությամբ ճանապարհի կառուցում, ինչպես նաեւ 6 կամուրջների ու 5 թունելների, այդ թվում՝ Խաչի լեռնանցքի տակ 9 կմ-անոց թունելի: Սա կլինի Եվրոպայում ամենաերկար թունելներից եւ ամենաբարդ ինժեներական կառույցներից մեկը: