Վրաստանի վարչապետի թեկնածու Իրակլի Ղարիբաշվիլին խորհրդարանի ամբիոնից դիմել է ընդդիմությանն ու կոչ արել վերադառնալ խորհրդարան, հաղորդում է «Սպուտնիկ Գրուզիա»-ն:
Խորհրդարան անցած 60 ընդդիմադիր պատգամավորներից աշխատանքի է գնացել միայն 6-ը, մնացածը հրաժարվել է պատգամավորական մանդատից՝ իշխանությանը մեղադրելով ընտրությունները կեղծելու մեջ:
«Այն, ինչ տեղի է ունենում այսօրվա խորհրդարանում, բացարձակ անընդունելի է: Դա նպատակաուղղված սաբոտաժ է մեր պետության դեմ: Ես ուզում եմ դիմել նրանց, քանի որ գիտեմ, որ կոնսենսուսի համար երկրի ապագայից ավելի լավ հիմք չկա: Մեր քաղաքական դիրքորոշումները կարող են երբեք չնմանվել, եւ տա Աստված, որ չնմանվեն, սակայն առողջ ընդդիմությունը եւ աշխատանքային քննարկումները մեզ կօգնեն վիճակը լավացնել»,-ասել է Ղարիբաշվիլին:
Վարչապետի թեկնածուն նաեւ նշել է, որ իշխանությունը խստորեն կպայքարի ապատեղեկատվության դեմ:
«Հավատացե՛ք, որ ժողովրդին քիչ են հետաքրքրում, օրինակ, Ընտրական օրենսգրքի մանրամասները, եւ թե ինչպես են մարդիկ հայտնվում խորհրդարանում, եթե այդ շենքից եւ այդ ամբիոնից նրանց ձայնը չի լսվում»,-հավելել է նա:
Այս պահին վարչապետի թեկնածուն պատրաստվում է պատասխանել իշխող կուսակցության ներկայացուցիչների հարցերին:
Դրանից հետո կքննարկվի Ղարիբաշվիլիի կառավարության վստահության հարցը:
