Հռոմի Պապ Ֆրանցիսկոսը հույս ունի մահանալ Հռոմում: Արգենտինացի լրագրող եւ բժիշկ Նելսոն Կաստրոյին տված հարցազրույցում Պապն ասել է, որ մտածում է մահվան մասին, սակայն չի վախենում դրանից:
«Պապերի առողջությունը» գրքից հատվածները հրապարակվել են La Nacion արգենտինական թերթում:
Հարցին՝ ինչպես է նա պատկերացնում իր վերջին օրերը՝ 84-ամյա Ֆրանցիսկոսը պատասխանել է. «Ես կլինեմ Հռոմի Պապը՝ գործող կամ պատվավոր, Հռոմում: Ես չեմ վերադառնա Արգենտինա»:
Վերջին ամիսներին հովվապետը ստիպված էր չեղարկել որոշ միջոցառումներ իշիասի խնդիրների պատճառով, սակայն, ինչպես հայտնի է, նա չունի այլ լուրջ հիվանդություններ:
Համաձայն նոր գրքի՝ «դա առաջին անգամն է, երբ Պապը քննարկում է իր առողջությունն այդպիսի թափանցիկ կերպով»:
Հովվապետը, որը նախկինում Բուենոս Այրեսի արքեպիսկոպոսն էր, ասում է, որ չի կարոտում իր հայրենի Արգենտինան: «Ոչ, ես չեմ կարոտում: Ես ապրել եմ այնտեղ 76 տարի: Ինձ մտահոգում են դրա խնդիրները»,-ակնարկել է տնտեսական ճգնաժամի մասին, որը ցնցել է այդ հարավամերիկյան երկիրը:
Հովվապետը պատմել է, որ դիմել է բժիշկների օգնությանը տագնապային զգացողության կապակցությամբ, երբ նա ստիպված էր գաղտնի դուրս բերել մարդկանց ռազմական դիկտատուրայի ժամանակ նրանց կյանքերը փրկելու համար:
«Պատկերացրեք մեքենայում թաքնված եւ վերմակով ծածկված մարդուն տեղափոխելու զգացողությունը, երբ պետք է երեք ռազմական հսկիչ անցակետ անցնել... Լարվածությունը, որն առաջացել է դրա հետեւանքով, եղել է աննախադեպ: Ես ստիպված էի գործ ունենալ իրավիճակներում, երբ ես չգիտեի՝ ինչ անել»,-ասել է հովվապետը:
Հարցին՝ այցելե՞լ է նա արդյոք թերապեւտին, Պապն ասել է. «Նա հոգեթերապեւտ էր: Վեց ամսվա ընթացքում նա օգնել է ինձ գտնել այդ ժամանակաշրջանի վախերը հաղթահարելու ձեւերը»:
