Բելորեչենսկում փողոցային ծեծկռտուքից հետո 22-ամյա երիտասարդ է սպանվել, դեպքի մյուս մասնակիցը վնասվածքներ է ստացել: Զանգվածային ծեծկռտուքը, որն ավարտվել է դանակահարությամբ, տեղի է ունեցել Գոգոլի փողոցի սրճարաններից մեկի մոտ: Քննիչները որպես դրա պատճառ նշում են կենցաղային բախումը: Երկու երիտասարդների դանակի վնասվածքներով տեղափոխել են քաղաքի հիվանդանոց, նրանցից մեկը մահացել է:

Երկրորդ տուժածը ներկայումս գտնվում է հիվանդանոցում, որտեղ շարունակում է անհրաժեշտ բուժում ստանալ, հայտնում է «КП-Кубань»-ը:

Նախնական տվյալների համաձայն, 2021 թվականի փետրվարի 28-ի երեկոյան երիտասարդների խումբը հանդիպել է Բելորեչենսկի Գոգոլի փողոցի սրճարաններից մեկի մոտ, որպեսզի լուծի նախօրեին ծագած կենցաղային խնդիրը: Նրանց միջեւ վիճաբանություն է տեղի ունեցել, որի ընթացքում տղամարդկանցից մեկը դանակով հարվածել է մյուսի կրծքին եւ մեկ այլ մարդու փորին: Դրանից հետո նա թաքնվել է, գրում է АиФ-ը:

Հարուցվել է քրեական գործ՝ 22-ամյա տղամարդու սպանության փաստով (ՌԴ ՔՕ 105-րդ հոդվածի 1-ին մաս) եւ մահացածի 31-ամյա ծանոթի սպանության փորձի փաստով ( ՌԴ ՔՕ 30-րդ հոդվածի 3-րդ մաս, 105-րդ հոդվածի 1-ին մաս):

Ներկայումս իրականացվում են քննչական գործողություններ եւ օպերատիվ-որոնողական միջոցառումներ: Քրեական գործի քննությունը շարունակվում է:

Ինչպես գրում է «Регион online»-ը, Բելորեչենսկի բնակիչները բախումը կապում են մասնակիցների ազգությունների հետ: Ինչպես հայտնի է դարձել, քննիչները պաշտոնապես չեն հայտարարել ազգամիջյան բախումների հավանականության մասին: Լուրերի տարածումից հետո քաղաքում երկու սփյուռքի ղեկավարները հանդես են եկել պաշտոնական ելույթով:

«Ես ինքս ամաչում եմ, որ իմ ժողովրդի ներկայացուցիչները այդպես են վարվել: Սա չպետք է լիներ: Նա ազգի խայտառակություն է, ես ներողություն եմ խնդրում նրա համար»,- ասել է Կրասնոդարի երկրամասի Բելորեչենսկի շրջանի ադրբեջանական համայնքի ներկայացուցիչ Աֆղան Ալազովը:

Բելորեչենսկի շրջանում Ռուսաստանի հայերի միության մասնաճյուղի ղեկավար Ռուբեն Մադելյանը հայտարարել է, որ հակամարտությունը ազգամիջյան չէ: «Մենք հանդիպեցինք ոստիկանության ղեկավարության, վարչակազմի ղեկավարի հետ, Բելորեչենսկ ժամանեցին Կրասնոդարի երկրամասի վարչակազմի ներկայացուցիչները: Իհարկե, հանցագործությունը ցնցել է բոլորին: Հուսով ենք, որ մարդասպանը կձերբակալվի եւ կպատժվի ամբողջ խստությամբ»,- Մադելյանի խոսքերն է մեջբերում «Кавказ.Реалии»-ն: «Տարածաշրջանում շատ ադրբեջանցիներ են ապրում: Վրաստանից շատ ներգաղթյալներ այստեղ ապրում են 1990-ականների սկզբից: Սպանության մեջ կասկածվողը տեղացի չէ, նա «անցորդ» է, անցնելիս է եղել այստեղով»,- հստակեցրել է լրատվամիջոցը:

Զուցակիցը պնդում է, որ ինքը արդեն հանդիպել է հայկական սփյուռքի ներկայացուցչի հետ, քննարկել են միջադեպը եւ «միմյանցից պահանջներ չունեն»:

Տեղական սրճարանի մոտ ծեծկռտուքի հետ կապված իրավիճակը վերահսկողության տակ են պահում քաղաքի եւ երկրամասի վարչական ներկայացուցիչները։