Հայաստանի երկրորդ նախագահ Ռոբերտ Քոչարյանի եւ մյուսների գործով դատական նիստը հետաձգվել է պաշտպանության նախկին նախարար Սեյրան Օհանյանի վիճակի վատթարացման պատճառով:
Օհանյանի փաստաբան Կարեն Մեժլումյանը հայտնեց, որ իր պաշտպանյալը հոսպիտալում է, այնտեղ էր տեղափոխվել դեռեւս մարտի 7-ին: Փաստաբանը 5 րոպեանոց ընդմիջում խնդրեց՝ պարզելու համար, թե երբ են նախատեսում նրան դուրս գրել: Սեյրան Օհանյանի հետ խոսելով՝ փաստաբանը դատարանին հայտնեց, որ տվյալներ չկան, սակայն դատարանը կտեղեկացվի հենց Սեյրան Օհանյանը դուրս գրվի: Փաստաբանը խոստացավ հոսպիտալացման պատճառների վերաբերյալ փաստաթղթերը ներկայացնել հաջորդ նիստին:
Դատարան ներկայացվեցին նաեւ նախկին փոխվարչապետ Արմեն Գեւորգյանի վիճակի վատթարացմանը եւ անցյալ նիստին բացակայելուն վերաբերող բժշկական փաստաթղթերը:
Հաջորդ նիստը տեղի կունենա մարտի 16-ին ժամը 13-ին:
