Եթե մեկը գոնե մինչեւ 4-րդ դասարան սովորել է, ինքը գիտի, որ դա հիմարություն է: Այս մասին, այսօր՝ մարտի 9-ին, Բաղրամյան պողոտայում ընդդիմության հանրահավաքից առաջ լրագրողների հետ զրույցում նշեց «Հայրենիքի փրկության շարժման» վարչապետի թեկնածու Վազգեն Մանուկյանը՝ անդրադառնալով իշխանությունների կողմից շրջանառության մեջ դրվող տեսակետին, թե ընդդիմության գործողությունները, հայտարարությունները խոչընդոտում են, գերիների վերադարձին, տապալվում է գործընթացը:
«Այդպես էլ տապալվեց պատերազմը... նրանք հիմար են եւ ինչ ասես ասում են, բայց դուք թղթակից եք, զարգացած մարդ եք, պարտադիր է կրկնե՞ք: Իշխանության ներկայացուցիչ լինելը դեռ չի նշանակում լինել խելոք: Բերեք մի փաստարկ, որ ընդդիմության գործունեությունը խանգարում է գերիների վերադարձին»,-ասաց նա:
Հարցին, թե ինչու են ուշանում իրենց խոստացած վճռական գործողությունները, Վազգեն Մանուկյանն արձագանքեց. «Վճռական գործերն առջեւում են: Դուք մի բան հաշվի առեք, Նիկոլ Փաշինյանը իշխանությունը պահել չի կարող, որովհետեւ եւ օրեցօր ժողովրդի ավելի լայն հատվածներ իրեն չեն ընդունում, բոլոր ինստիտուտներն իրեն չեն ընդունում: Մնում է մի ձեւ, անցնել բռնապետության, իսկ դրա համար իրեն պետք է բանակը: Նրան չհաջողվեց բանակը ջարդել եւ չի հաջողվելու»:
