Ռոբերտ Քոչարյանի եւ մյուսներով գործով դատախազ Գեւորգ Բաղդասարյանը դատարանի դահլիճում խոսքն ավարտեց կասկածելի արտահայտությամբ:
Փաստաբան Արամ Վարդեւանյանը միջնորդություն ներկայացրեց Բաղդասարյանի բացարկի մասին՝ պատճառաբանելով Ծաղկաձորում «Իմ քայլի» պատգամավորի հետ հանդիպմամբ: Դատարանը միջնորդությունը չքննարկեց՝ հիշեցնելով, որ նման միջնորդություն նախկինում արդեն ներկայացվել է:
Գեւորգ Բաղդասարյանը, սակայն, իրեն հատուկ բռնկունությամբ արձագանքեց՝ տառացիորեն ասելով հետեւյալը. «Գեւորգ Բաղդասարյանին չեն օգտագործում, այդ նա է օգտագործում»: Դատավոր Աննա Դանիբեկյանը լռեց:
Փաստաբան Հայկ Ալումյանը բողոք հայտնեց դատավորի գործողությունների դեմ, որը չի կասեցնում քրեական ենթամշակույթի դրսեւորումները: «Փաստաբանները ծանոթ են այդպիսի արտահայտություններին, եւ դրանք հատուկ են քրեական ենթամշակույթին: Դատարանի դահլիճն այն վայրը չէ, որտեղ կարելի է նման բառապաշար օգտագործել, այն էլ՝ մեր դեմ»,- շեշտեց փաստաբանը: Ինչ վերաբերում է դատավորի որոշման բովանդակությանը, փաստաբանը հիշեցրեց, որ միջնորդությունները ներկայացվում են բանավոր, իսկ կողմերը պարտավոր չեն հավատալու դատավորի խոսքին:
Փաստաբան Արամ Վարդեւանյանը ցանկացավ պատասխանել Գեւորգ Բաղդասարյանին, սակայն դատավորը որոշեց, որ բանավեճը պետք է դադարեցնել:
