Ցավոք, կա հավանականություն, որ հայկական շուկայում կարող են հայտնվել ադրբեջանական գազ եւ բենզին: Այս մասին լրագրողների հետ հանդիպման ժամանակ ասաց Ադրբեջանի հարցերով փորձագետ Անժելա Էլիբեգովան:
«Մենք կարող ենք ականատես լինել Հայաստանում ադրբեջանական գազի եւ բենզինի գնմանը, իսկ այդ գումարով Բաքուն սպառազինություն կգնի, որը կկիրառի մեր դեմ»,-ասաց նա: Անդրադառնալով Արցախի անկախության ճանաչման թեմային՝ փորձագետը պարզաբանեց, որ մեզ համար դա պետք է առաջնային լինի, եւ եթե շարունակենք ամեն ինչ հանձնել, ապա կհանգենք ֆիզիկական ոչնչացման: «Ադրբեջանում հայաֆոբիան էլ ավելի է սրվել, իսկ պաշտոնական հռետորաբանությունն էլ ավելի է խստացել: Ալիեւի նպատակն է զրկել Արցախի մնացած մասից եւ Սյունիքից»,-հավելեց Էլիբեգովան:
Նա նշեց, որ Ալիեւը ծրագրում է Ադրբեջանին անցած տարածքներում բնակեցնել հայկական կողմի համար ոչ այդքան ընդունելի կոնտինգենտ: «Մարդկանց մի մասին պարզապես կստիպեն այնտեղ տեղափոխվել, սակայն այժմ այնտեղ չկան հաղորդակցություններ եւ լոգիստիկա: Աղդամի դեպքում, օրինակ, կպահանջվի 10 տարի այնտեղ կյանքը վերականգնելու համար»,-եզրափակեց փորձագետը: