Հայաստանի Կառավարությունն առաջարկում է խստացնել պատիժը լրագրողների մասնագիտական գործունեությունը խոչընդոտելու համար: Այս մասին մարտի 24-ին Ազգային ժողովի նիստում Քրեական օրենսգրքում փոփոխություններ կատարելու մասին օրինագծի քննարկման ժամանակ ասաց արդարադատության փոխնախարար Արմեն Հովհաննիսյանը:
Նրա խոսքով՝ այս օրենսդրական նախաձեռնությամբ նախատեսված է քրեական պատասխանատվություն լրագրողի մասնագիտական օրինական գործունեությունը խոչընդոտելու համար, ինչպես նաեւ պատասխանատվություն է նախատեսված պաշտոնատար անձի կողմից կատարված նույն արարքի համար: Դրանից բացի, քրեական պատասխանատվություն է նախատեսված այն արարքների համար, երբ այդպիսի գործողություններն ուղեկցվել են լրագրողի կամ նրա ընտանիքի անդամի նկատմամբ բռնության, կյանքի եւ առողջության սպառնալիքներով: «Այս փոփոխությունները կապահովեն իրավական որոշակիություն, պատժի անխուսափելիություն, ինչպես նաեւ լրագրողի տեղեկատվություն հավաքելու եւ ստանալու իրավունքի պաշտպանություն եւ ապահովում»,- պարզաբանեց փոխնախարարը:
Նշենք, որ այս պահին, ՀՀ Քրեական օրենսգրքի 164-րդ հոդվածի համաձայն (լրագրողի օրինական մասնագիտական գործունեությունը խոչընդոտելը) լրագրողի օրինական մասնագիտական գործունեությունը խոչընդոտելու կամ նրան տեղեկատվության տարածմանը հարկադրելը կամ տեղեկատվության տարածումը մերժելը պատժվում է տուգանքով՝ 50 հազարից 100 հազար դրամի չափով, կամ ուղղիչ աշխատանքներով՝ մեկ տարուց ոչ ավելի ժամկետով: Միեւնույն ժամանակ, նույն արարքները, որոնք կատարել է պաշտոնատար անձը՝ օգտագործելով իր պաշտոնական դիրքը, պատժվում են ուղղիչ աշխատանքներով՝ ոչ ավելի, քան երկու տարի ժամկետով, կամ ազատազրկմամբ՝ ոչ ավելի, քան երեք տարի ժամկետով՝ որոշակի պաշտոններ զբաղեցնելու կամ որոշակի գործունեությամբ զբաղվելու իրավունքի զրկմամբ՝ ոչ ավելի, քան երեք տարի ժամկետով, կամ առանց դրա:
