Հայաստանի երկրորդ նախագահ Ռոբերտ Քոչարյանը ներկա չէ դատական նիստին:
Նրա փաստաբան Հայկ Ալումյանը հայտնեց, որ նախկին նախագահը բժշկի ցուցումով, ախտանիշներից ելնելով, կորոնավիրուսի թեստ է հանձնել, եւ այժմ սպասում է պատասխանին: Փաստաբանը հայտնել է, որ նախկին նախագահի մտերիմների շրջանում հաստատված դեպք կա: «Եթե դատարանին հետաքրքիր է, թե՝ կոնկրետ ում, ես ձեզ կտեղեկացնեմ դռնփակ: Եթե դատարանը դա չի կարեւորում, ես չեմ խնդրի այդ մասն անցկացնել դռնփակ»,- ասաց փաստաբանը՝ հավելելով, որ այժմ Քոչարյանը շփվածի կարգավիճակում է եւ քանի դեռ թեստի բացասական պատասխան չկա, նա չի ուզում որեւէ մեկին վտանգել: Ալումյանը դատարանին ցույց տվեց փաստաթուղթը, որը հաստատում է, որ թեստն անցկացվել է բժշկական ցուցումներով: Միեւնույն ժամանակ, փաստաբանը նշեց, որ եթե դատարանը պարտադիր համարի Քոչարյանի ներկայությունը, նա կգա, եթե դատարանն իր վրա վերցնի հնարավոր հետեւանքների պատասխանատվությունը: Դրա անհրաժեշտությունը չեղավ:
Դատավոր Աննա Դանիբեկյանը հայտնեց, որ փաստաբան Արամ Վարդեւանյանից հաղորդագրություն է ստացվել նաեւ այն մասին, որ նա մեկուսացված է եւ սպասում է թեստի արդյունքին:
Դատախազ Գեւորգ Բաղդասարյանը փաստաթուղթ պահանջեց, դատարանը կարճ ընդմիջում հայտարարեց:
Հիշեցնենք, որ հոկտեմբերի վերջին պատերազմի օրերին նախկին նախագահներ Լեւոն Տեր-Պետրոսյանը եւ Ռոբերտ Քոչարյանը նախատեսում էին այցելել Մոսկվա՝ ԼՂՀ հիմնախնդիրը քննարկելու համար: Այցի նախօրեին Քոչարյանի մոտ անսպասելիորեն կորոնավիրուս հայտնաբերվեց: