Իրանի իշխանություններն ունակ են սկսել ուրանի հարստացումը մինչեւ 90%: Այս մասին հայտարարել է Իրանի նախագահ Հասան Ռոհանին, հայտնում է ՏԱՍՍ-ը:
«Արդեն այսօր մենք կարող ենք ուրանի հարստացում իրականացնել մինչեւ 90%»,- ասել է նա: Միաժամանակ նախագահը հավելել է, որ «Իրանը չի ձգտում միջուկային ռումբ ստեղծել»:
Նրա խոսքով՝ «այն դեպքում, եթե կողմերը վերադառնան միջուկային գործարքին, [Իրանում ուրանի] հարստացումը չի գերազանցի 3,67%-ը (Գործողությունների համատեղ համապարփակ ծրագրի շրջանակներում նախատեսված հարստացման առավելագույն աստիճանը)»:
Երեքշաբթի օրը Իրանի փոխարտգործնախարար Աբբաս Արագչին հայտարարել էր, որ Թեհրանը չորեքշաբթի օրվանից կսկսի ուրանի հարստացումը 60%-ով: Ռոհանիի խոսքով՝ այդ միջոցը ձեռնարկվել է ի պատասխան ապրիլի 11-ին Նաթանզի միջուկային կայանում իսրայելական դիվերսիաների: Իրանի նախագահը նշել է, որ հարստացումը կիրականացվի խաղաղ նպատակներով եւ ԱԷՄԳ-ի վերահսկողության ներքո:
