Ադրբեջանը չի կատարում անցյալ տարվա նոյեմբերի 9-ի համատեղ հայտարարության շրջանակներում ստանձնած պարտավորությունները: Մենք պետք է պնդենք հայ ռազմագերիների եւ ձերբակալվածների վերադարձը: Այս մասին հայտարարել է պորտուգալացի պատգամավոր Պոլ Սոչպիսկոն՝ ելույթ ունենալով ԵԽԽՎ գարնանային նստաշրջանում:
«Հայաստանը կատարել է համաձայնագրի իր մասը, սակայն Ադրբեջանը մինչ այժմ դա չի արել:
Իսկ որտե՞ղ են հիմա Թուրքիան ու Ռուսաստանը: Նրանք միայն պատերազմի՞ գործընկերներ են, բայց ոչ խաղաղության հաստատմա՞ն: Հումանիտար սկզբունքների հաղթանակի հարցը մարդասիրական հարց է, երկարաժամկետ խաղաղության հասնելու հարց... Սա Եվրոպայի խորհրդի խնդիրն է: Ադրբեջանը ոչ միայն խախտում է եռակողմ հայտարարությունը, այլ նաեւ մի շարք կարեւոր կոնվենցիաներ»:
Նրա խոսքով՝ շատ կարեւոր է, որ Բաքուն տրամադրի բոլոր տեղեկությունները ռազմագերիների քանակի, պահման պայմանների մասին, քանի որ խոշտանգումների մասին տեղեկատվություն կա: «Մեր առաքելությունն այն է, որ Եվրախորհուրդը անի հնարավոր ամեն ինչ Հայաստանի եւ Ադրբեջանի միջեւ խաղաղություն եւ երկխոսություն հաստատելու համար: Կարեւոր է, որ կողմերը կատարեն պարտավորությունները՝ ղեկավարվելով բարի կամքի սկզբունքով»:
