Առանձնապես ոչինչ չենք խոսել,ասել է՝ ինչպես եք, ինչով եք զբաղվում: Այս մասին NEWS.am-ի հետ զրույցում նշեց Սյունիքի մարզի Շուռնուխ գյուղի բնակիչներից Վարդան Ալեքսանյանը՝ անդրադառնալով նրան, որ վարչապետ Նիկոլ Փաշինյանը երեկ ուշ երեկոյան այցելել է նաեւ իրենց տուն:
«Մեր տունը մնացել է հակառակորդի ձեռքում, այժմ ծանոթի տանն ենք մնում, որը պետք է վերադառնա Ռուսաստանից եւ ժամանակ են տվել դուրս գալու։ Վարչապետին այդ մասին չեմ ասել, երկար չի մնացել, մի քանի րոպեով մտել, մի քանի թեթեւ հարց է տվել եւ դուրս են եկել։ Մենք չէինք սպասում, տեսանք՝ բալկոնում մարդիկ կան, դուրս եկանք, տեսանք՝ վարչապետն է»,-ասաց նա:
Ավելի վաղ NEWS.am-ը հայտնել էր, որ ապրիլի 20-ին վարչապետ Նիկոլ Փաշինյանը խիստ գաղտնի պայմաններում ուղեւորվել է Սյունիքի մարզ։ Նրա այցի մասին տեղեկությունը խիստ գաղտնի է պահվել, ուժայիններն այդ մասին իմացել են վերջին պահին, նույնիսկ ճանապարհային ոստիկանությանն ընդամենը կես ժամ առաջ են տեղեկացրել, որ պետք է ուղեկցեն վարչապետին։
Փաշինյանը երեկ գիշերով այցելել էր Շուռնուխ համայնք։ Մամուլում լուրեր են շրջանառվում, որ Փաշինյանին բնակիչները ընդունել են վրդովված եւ սառը։
Իսկ արդեն այսօր Նիկոլ Փաշինյանին հայհոյանքներով եւ բողոքի ակցիաներով են դիմավորել Ագարակում, Մեղրիում:
Հիշեցնենք, որ նախօրեին անսպասելիորեն փոխվել են Սյունիքի ոստիկանապետը, նրա տեղակալը, Գորիսի եւ Կապանի ոստիկանապետերը։ Մեկ համայնքից բացի Սյունիքի բոլոր համայնքների ղեկավարները հրապարակավ պահանջել են Փաշինյանի հրաժարականը։