ԱՄՆ նախագահ Ջո Բայդենը պատմական նշանակություն ունեցող որոշում կայացրեց՝ ճանաչելով Օսմանյան կայսրությունում հայերի ցեղասպանությունը: Այս մասին BBC-ին տված հարցազրույցում ասել է ԱՄՆ-ում Հայաստանի արտակարգ եւ լիազոր դեսպան Վարուժան Ներսիսյանը:
Նրա խոսքով՝ Բայդենի խոսքերը, ինչպես նաեւ Կոնգրեսի նախորդ որոշումը, նշանակում են ԱՄՆ-ի կողմից իրենց պատմական հայրենիքում 1,5 միլիոն հայերի ցեղասպանության ճանաչում: Դեսպանը նշել է, որ սա հստակ ուղերձ է ապագայի համար: Նա անդրադարձել է այն փաստին, որ, Հայոց ցեղասպանությունը չդատապարտելով, մարդկությունը թույլ տվեց Հոլոքոստը, ցեղասպանությունները Ռուանդայում, Դարֆուրում եւ այլ վայրերում: Ահա թե ինչու ճանաչումը շատ կարեւոր է, եւ Ցեղասպանության նախադեպի համար Ռաֆայել Լեմկինը այս եզրույթն է առաջարկել:
«Իհարկե, այս հայտարարությունը Թուրքիային հնարավորություն է տալիս համակերպվել իր անցյալի հետ եւ ճանաչել: Եթե Թուրքիան ցանկանում է բուժել վերքերը, այլ ոչ թե կրկին բացել դրանք: Այս հայտարարությունը Թուրքիային հնարավորություն է տալիս ճանաչել Ցեղասպանությունը, ապա կարգավորել հարաբերությունները Հայաստանի հետ: Սակայն Թուրքիան ոչ միայն չի ճանաչում ցեղասպանությունը, այլեւ հերքում է»,- ընդգծել է դեսպանը:
Դիվանագետն արձանագրել է, որ Թուրքիան շարունակում է սպառնալիք մնալ Հայաստանի համար, ինչպես դա եղավ նախորդ տարվա սեպտեմբերին, երբ Թուրքիան լիակատար աջակցություն ցուցաբերեց Արցախի դեմ Ադրբեջանի լայնամասշտաբ ագրեսիային: Թուրքիան ջիհադիստ-ահաբեկիչներ տեղափոխեց Մերձավոր Արեւելքից:
«Ահա թե ինչու Հայոց ցեղասպանության ճանաչումը չափազանց կարեւոր է, քանի որ Թուրքիան դեռ շարունակում է նույն ցեղասպանական մտադրություններն ու քաղաքականությունը այժմյան Հայաստանի Հանրապետության դեմ»,- հայտարարել է դեսպանը:
