Հայաստանում ընտրությունների դիտարկումը, ավելի քան երբեւէ, ուշադիր կիրականացվի: Այս մասին մայիսի 10-ին Ազգային ժողովի հատուկ նիստում ՀՀ վարչապետի ընտրության հարցի քննարկման ժամանակ հայտարարեց վարչապետի պաշտոնակատար Նիկոլ Փաշինյանը՝ պատասխանելով պատգամավորների հարցերին:
Այսպես, նրա խոսքով, հանրապետության ընտրատեղամասերի 97%-ում կտեղադրվեն Կենտրոնական ընտրական հանձնաժողովի տեսախցիկներ, որոնք ուղիղ հեռարձակում կիրականացնեն:
«Վերջին ընտրությունների փորձից բոլորը կարողացան համոզվել, թե որքանով է դա փոխում իրավիճակը ինչպես քվեարկության գործընթացում, այնպես էլ ձայների հաշվարկի ժամանակ: Բացի ԿԸՀ տեսախցիկներից, բոլորն էլ իրենց հեռախոսներում տեսախցիկներ ունեն: Դրանց օգնությամբ կարելի է ոչ միայն ձայնագրել, այլեւ ուղիղ հեռարձակում իրականացնել: Թեկնածուների վստահված անձինք, լինեն նրանք իշխանությունից, թե ընդդիմությունից, կկարողանան ուղիղ հեռարձակում իրականացնել տեղամասերից: Չափազանցություն չի լինի ասել, որ յուրաքանչյուր քվեաթերթիկ կլինի հեռուստախցիկների օբյեկտիվում»,- ասաց վարչապետի պաշտոնակատարը:
