Wi-Fi անլար տեխնոլոգիայում հայտնաբերվել են մի շարք խոցելիություններ, որոնք հեշտացնում են հաքերային հարձակումները: Այսպիսի եզրակացության է եկել թվային անվտանգության ոլորտում բելգիացի հետազոտող Մեթի Վանհոֆը, հաղորդում է «ՌԻԱ Նովոստին»:

Frag Attacks կոչվող խոցելիությունը թույլ է տալիս անլար ցանցի սահմաններում տվյալներ հավաքել սարքերի սեփականատերերի մասին եւ վնասակար կոդ գործարկել նրանց սարքերում: Փորձերի միջոցով Վանհոֆը պարզել է, որ թեստավորված տնային չորս սարքերից երկուսը ենթարկվել են այդ գործողությանը: Խնդիրը հայտնաբերվել է ինտերնետային մի քանի սարքերում եւ որոշ սմարթֆոններում:

Ինչպես ընդգծում է հետազոտողը, Wi-Fi-ի խնդիրների մեծ մասը չի լուծվում 1997 թվականից, երբ ներդրվեց ստանդարտը: Դրանք առաջացել են ծրագրավորողների եւ սարքավորումներ մշակողների սխալների արդյունքում: Հարձակվողի համար բավականին դժվար կլինի օգտվել Frag Attacks-ից, բայց մեծ ռեսուրսներ ունեցող հաքերը կկարողանա հաջող հարձակում իրականացնել որոշակի սարքի վրա:

WiFi Alliance-ը, որը վերահսկում է ստանդարտը, ասել է, որ աշխատում է խնդրի լուծման ուղղությամբ` շեշտելով, որ չկա որեւէ ապացույց, թե խոցելիությունները չարամտորեն օգտագործվում են անլար ցանցի օգտատերերի դեմ։