Սահմանագծի փոփոխությունից հետո կան վայրեր, որտեղ բնակլիմայական պայմանները, ռելիեֆը շատ բարդ են և որոշ հատվածներում հակառակորդը տեղակայման գործընթաց չէր արել, հիմա եղանակային պայմանները փոխվել են տեղակայման պրոցես են անում, մեր Զինված ուժերն էլ հետևում են, որպեսզի իրենք իրենց տեղակայման վայրերից առաջ չգան, քանի որ ռելիեֆը բարդ է, հեշտ չէ սահմանագիծը որոշել: Այս մասին, այսօր՝ մայիսի 13-ին, լրագրողների հետ հանդիպման ժամանակ ասաց Գեղարքունիքի մարզպետ Գնել Սանոսյանը:
Հարցին, թե այն, ինչ տեղի ունեցած Սյունիքում, նույն վիճակն է նաեւ Գեղարքունիքո՞ւմ, մարզպետը բացասական պատասխան տվեց. «Ոչ, Հայաստանի պետական սահմանը պահպանվել է՝ մեկ-երկու տեղ լանջով սահմանագիծ կար, որը մերոնք պնդում էին, որ պետք է այդ հատվածից հետ նստեն, որն ընթացքում կարգավորվեց: Բացարձակապես լարվածություն չկա:
Երեկ ես մի քանի ժամ եղել եմ Վերին Շորժայում, եղել եմ հենց այն հատվածում, որտեղ այդ աշխատանքներն են: Մեր Զինված ուժերը աշխատում են, քարտեզները կան, սա այն նույն պրոցեսն է, որը կար նոյեմբեր–դեկտեմբեր ամիսներին»,- նշեց նա:
Հարցին, թե բնակիչներին, կարո՞ղ եք ասել, որ վիճակն անվտանգ է՝ լարվածություն, ագրեսիա չկա, Սանոսյանը պատասխանեց. «Բնակիչները տեսել են, որ վիճակը հանգիստ է, երեկ բնակիչներից շատ մարդ կար մեզ հետ, այնտեղ որևէ արտառոց բան տեղի չի ունեցել, ընդամենը բանակցում են իրար հետ՝ սահմանագիծը ճշգրտում են»:
Հարցին, թե Սոթքի ոսկու հանքում ի՞նչ վիճակ է, արդյո՞ք հանքն աշխատում է, աշխատակիցների շրջանում կրճատումներ, ի վերջո, եղա՞ն թե ոչ, Սանոսյանը պատասխանեց, որ հանքն աշխատում է, մոտ 280 աշխատողի կրճատում է եղել: