19FortyFive պարբերականը մեջբերում է բրիտանացի ռազմական խորհրդատու Նիկոլաս Դրամոնդի կարծիքը, ով հաշվարկել է, որ ավելի քան 100 տարի անց այն բանից հետո, երբ առաջին տանկերը մասնակցեցին ռազմական գործողություններին, աշխարհի տարբեր երկրների բանակներում ծառայում է 73000 տանկ, հայտնում է RG-ն:

«Շատ աղբյուրներ համաձայն են, որ Ռուսաստանն աշխարհի տանկային թագուհին է՝ մոտ 13000 տանկով»,- գրում է թերթը: Ընդ որում, նշվում է, որ T-80-ների եւ T-72-ների զգալի մասը պահուստային է: Սակայն անհրաժեշտության դեպքում Ռուսաստանը կարող է «հսկայական տանկային ուժեր տեղակայել»:

Հյուսիսային Կորեան տանկերի ընդհանուր քանակով երկրորդ տեղում է: Այն 6145 տանկ ունի: Հրապարակման հեղինակի կարծիքով՝այս դեպքում խոսքը «թղթե վագրի» մասին է, քանի որ հաշվի են առնվում չափազանց հնացած սարքավորումները, այդ թվում՝ T-54/55-ը եւ T-34-ը, չնայած Փհենյանը հայտնում է նաեւ զինանոցում առաջադեմ մեքենաների առկայության մասին:

ԱՄՆ-ն՝ մոտ 6100 տանկով, վարկանիշում զբաղեցնում էր միայն երրորդ տեղը: 19FortyFive-ը գրում է, որ ամերիկյան զրահամեքենաների ողնաշարը երրորդ սերնդի M1 Abrams-ներն են, որոնք այժմ արդիականացման փուլում են: Այդ տրանսպորտային միջոցները տանկային դասական են կոչվում:

Վարկանիշում Հնդկաստանը զբաղեցնում է չորրորդ տեղը: Այն զինված է շուրջ 4730 տանկով, այդ թվում՝ բազմաթիվ T-72-ներ եւ T-90-ներ: Սակայն պատերազմի դեպքում Հնդկաստանը կկարողանա օգտագործել նաեւ շուրջ 8700 միավոր այլ զրահամեքենա եւ 235 ինքնագնաց հրետանային սարքավորում:

Զարմանալի է, որ պարբերականը նշում է այն փաստը, որ տանկերի քանակով 5-րդ երկիրն աշխարհում Սիրիան է: Այն ուներ շուրջ 3740 տանկ: Սակայն հիմա հաստատ հայտնի չէ, թե դրանցից քանիսը կարող են իրականում օգտագործվել տարիներ շարունակվող պատերազմից հետո: Բացի այդ, ինչպես նշում է հրապարակման հեղինակը, այդ մեքենաներից շատերը հնացած են: