Գերմանիայի արտաքին գործերի նախարար Հայկո Մաասը երկիր կատարած իր այցի ընթացքում աջակցություն է հայտնել Իսրայելին եւ Գազայի հատվածում հրադադար հաստատելու կոչ արել հրեական պետության եւ ՀԱՄԱՍ-ի իսլամիստ կառավարիչների միջեւ, տեղեկացնում է AFP-ը։
«Ես եկել եմ այստեղ, որպեսզի հայտնեմ իմ համերաշխությունը... Իսրայելն իրավունք ունի պաշտպանվելու այս հուժկու եւ անընդունելի հարձակումից»,- ասել է նա իսրայելցի իր պաշտոնակից Գաբի Աշքենազիի հետ Թել Ավիվում տեղի ունեցած համատեղ մամուլի ասուլիսում։ «Թույլ տվեք ինձ սա շատ հստակ ասել եւս մեկ անգամ. մեզ համար Իսրայելի անվտանգությունը եւ բոլոր հրեաների անվտանգությունը Գերմանիայում քննարկման ենթակա չէ, եւ Իսրայելը միշտ կարող է հույս դնել մեզ վրա»,- ասել է Մաասը։
Նրա խոսքով՝ անցած շաբաթ նա «գրեթե մշտապես կապ է պահպանել» Աշքենազիի, ինչպես նաեւ Կահիրեի, Դոհայի, Ամանի ու Վաշինգտոնի դիվանագետների հետ։ «Ես հույս ունեմ, որ հրադադարի հաստատմանն ուղղված ջանքերը կպսակվեն հաջողությամբ»,- ասել է նա։
Նախատեսվում է, որ Մաասը կհանդիպի Պաղեստինի նախագահ Մահմուդ Աբասի հետ Ռամալլահում։
