Թուրքիան դրդել է ՆԱՏՕ-ում դաշնակիցներին մեղմացնել Ryanair-ի ինքնաթիռի միջադեպի շուրջ պաշտոնական արձագանքը, հաղորդում է Reuters-ը՝ հղում անելով այդ հարցին լավատեղյակ դիվանագետներին:
Չորեքշաբթի ՆԱՏՕ-ի 30 դաշնակից հրապարակել է հայտարարություն, որում դատապարտել է Ryanair-ի ինքնաթիռի վայրէջքը, որի նպատակն էր լրագրող Ռոման Պրոտասեւիչին ձերբակալելը, սակայն որում որեւէ խոսք չի եղել պատժիչ միջոցառումների մասին, որոնց ուղղությամբ պնդել են Բալթյան երկրներից դաշնակիցներն ու Լեհաստանը:
Երկու դիվանագետների խոսքով՝ Անկարան պնդել է, որ Բելառուսի նկատմամբ Արեւմուտքի նոր պատժամիջոցները սատարելու մասին ցանկացած հիշատակումն ու այդտեղ քաղաքական բանտարկյալներին ազատելու կոչերը բացառվեն տեքստից: Նրանք հավելել են, որ հեռացվել էին նաեւ ձեւակերպումները, որոնք սպառնալիք էին Բելառուսի հետ ՆԱՏՕ-ի համագործակցության համար:
Դիվանագետները հայտարարել են, որ Անկարան, հնարավոր է, փորձում է պահպանել կապերը Մոսկվայի հետ, որը Բելառուսի մտերիմ դաշնակիցն է, եւ սատարել տնտեսական հարաբերություններ Բելառուսի հետ Turkish Airlines-ի միջոցով, որը կատարում է ամենօրյա չվերթներ դեպի Մինսկ: Մեկ այլ հավանական տարբերակ է Թուրքիայի՝ այս ամառ COVID-19 համավարակից հետո ռուս զբոսաշրջիկներին ընդունելու ցանկությունը:
ՆԱՏՕ-ի պաշտոնական ներկայացուցիչն ասել է, որ Հյուսիսատլանտյան միության՝ Բելառուսի հարցի շուրջ հայտարարությունը համաձայնեցվել է բոլոր 30 դաշնակիցների կողմից:
3 դիվանագետների խոսքով՝ Ստոլտենբերգը ստացել է բոլոր դաշնակիցների, այդ թվում՝ Թուրքիայի համաձայնությունը վերջնական տեքստի վերաբերյալ, որը հրապարակվել է ՆԱՏՕ-ի կայքում, որպեսզի խուսափի հետագա տարաձայնություններից:
Դիվանագետները նշել են, որ տեքստը մեղմացնելու ուղղությամբ Թուրքիայի համառությունը տխրեցրել է մի շարք դաշնակիցներին, մասնավորապես, Լեհաստանին, Լիտվային եւ Լատվիային, որոնք պահանջել են առավել կտրուկ ձեւակերպումներ:
Նրանցից մեկը նշել է, որ Անկարայի դիմադրությունը հիմնականում ուղղված էր ձեւակերպումների կիրառմանը, որոնք տարբերվում էին ԵՄ ձեւակերպումներից, որում մանրամասն ներկայացված են պատժամիջոցների մասին առաջարկները:
«Բազմաթիվ դաշնակիցներ շատ հիասթափվել էին Թուրքիայից: ՆԱՏՕ-ի համար կարեւոր է արձագանքելը, եւ հասկանալի չէ՝ ինչու է Անկարան ցանկացել պաշտպանել Լուկաշենկոյին»,-ասել է եվրոպացի դիվանագետը, որը ներկա է եղել քննարկմանը: