Ֆրանսիայի քաղաքացի Բենժամեն Բրիերը, որը գտնվում է Իրանում կալանքի տակ 2020 թվականից, կկանգնի դատարանի առաջ լրտեսության եւ քարոզչության մեղադրանքով, հաղորդում է DW-ը։
Բրիերը մեղադրվում է նրանում, որ դրոնի միջոցով լուսանկարել է «արգելված շրջանները» Իրանի արգելոցներից մեկում, հայտնել է փաստաբան Սաիդ Դեգխանը։ Բրիերը նաեւ մեղադրվում է քարոզչության մեջ, քանի որ սոցիալական ցանցերում հարց է տվել՝ ինչու է Իրանում պարտադիր կանանց համար գլխաշոր կրելը, իսկ մյուս մահմեդական երկրներում կանանց ընտրության իրավունք է տրվում։ Ներկայում դատախազությունը նախապատրաստում է մեղարդական եզրակացության տեքստը։ Իրանում լրտեսության համար նախատեսվում է մահապատիժ, իսկ «համակարգի դեմ քարոզչության» համար՝ մինչեւ մեկ տարի ժամկետով ազատազրկում։
Բրիերն իր քրոջ՝ Բլանդինի հետ 2018 թվականին Իրան էր ժամանել որպես զբոսաշրջիկ եւ նախքան անցած տարի մայիսին բերման ենթարկվելը երթեւեկում էր երկրի տարածքով քեմփինգի համար ավտոֆուրգոնով։ Ներկայում նա պահվում է Իրանի հյուսիս-արեւելքում՝ Մեշխեդում։ Բլանդին Բրիերը վերջերս ֆրանսիական մամուլում հրապարակել է նախագահ Էմանուել Մակրոնին ուղղված բաց նամակ, որում կոչ է արել գործել իր եղբորն ազատելու ուղղությամբ։ Նրա խոսքով՝ Բենժամեն Բրիերին ձերբակալել են առանց որեւէ առիթի եւ վերածել նրան «բանակցությունների համար գործիքի»։