Ես ուրախ կլինեի, եթե ստիպված չլինեի դա ապացուցել երրորդ անգամ: Բայց իրավիճակն այնպիսին է, որ յուրաքանչյուր հայ, հատկապես իմ փորձառությամբ մարդը, պարտավոր է լինել առաջին շարքերում, պարտավոր է իր վրա վերցնել երկրի համար պատասխանատվությունը: Այս մասին Կապանում կայացած հանրահավաքում հայտարարեց ՀՀ երկրորդ նախագահ, «Հայաստան» դաշինքի առաջնորդ Ռոբերտ Քոչարյանը:
«Մի մարդը չի կարող լուծել բոլոր հարցերը: Բայց մեր թիմն այնքան հարուստ է փորձով, որ դրանից հնարավոր է կազմել 3-4 կառավարություններ եւ վստահ լինել, որ բոլոր հարցերը հնարավոր է լուծել: Մեր թիմի անդամները պատրաստ են իրենց զոհաբերել հանուն իրենց երկրի»,- ընդգծեց Քոչարյանը:
Նա հավելեց, որ այս ընտրությունները էապես տարբերվում են բոլոր նախորդներից. «Ես անցել եմ 2 նախընտրական արշավ, երկուսն էլ՝ 2 փուլով: Բայց բոլորում խոսքն այն մասին էր, թե կառավարությունն ավելի լավն է, թե ոչ, խոսքը թիմեր կամ անձեր փոխելու մասին էր: Նախկինում երբեք խոսք չի դրվել երկրի լինել-չլինելու հարցը: Սահմանի անվտանգության մասին երբեք խոսք չի եղել: Ամեն ինչի մասին, ինչը մեր մտքով չի անցել, որ կարելի է քննարկել: Բայց հիմա խոսքն այդ մասին է, այն մասին, որ Սյունիք գալու համար պետք է անցնել Ադրբեջանի դրոշի տակով: Ջանքեր են պետք այս իրավիճակից դուրս գալու համար: Պետք են մարդիկ, ովքեր գիտեն ինչ անել եւ համարձակություն ունեն պատասխանատվություն ստանձնել»:
Քոչարյանը հիշեցրել է, որ իշխանությունների համար քարոզչական արշավը կատարած աշխատանքի, կատարած խոստումների մասին զեկուցելու անհրաժեշտությունն է: «Իշխանությունները զեկուցե՞լ են արվածի մասին: Ոչ։ Մրցակցի դիմանկարով ընտրողների մոտ գնալու համար շատ խելք պետք չէ (ակնարկ Նիկոլ Փաշինյանի մասին, ով Քոչարյանի լուսանկարները ցույց էր տալիս իր կողմնակիցներին - խմբ.): Դրանք նույնիսկ արժանի չեն, որ իրենց մասին խոսենք: Իմ կարծիքով, նրանք այլեւս չկան»,- ասաց Քոչարյանը՝ հավելելով, որ ընտրություններից եւ դաշինքի հաղթանակից հետո հնարավորինս սեղմ ժամկետում բնակչությունը դրական արդյունքներ կզգա անվտանգության, տնտեսության, ներդրումների եւ բանակի վերականգնման ոլորտներում: