Լեռնային Ղարաբաղը նույնպես ներառված է այն հարցերի ցանկում, որոնք ԱՄՆ-ի եւ Թուրքիայի նախագահները պետք է քննարկեն ՆԱՏՕ-ի գագաթաժողովի շրջանակներում իրենց հանդիպման ընթացքում:
«Երկու առաջնորդները կունենան լայն եւ համընդգրկուն օրակարգ տարածաշրջանային խնդիրների վերաբերյալ, ինչպիսիք են Միջերկրական ծովի արեւելքը, Սիրիան, Իրանը, Լեռնային Ղարաբաղը»,- ճեպազրույցում հայտարարել է ԱՄՆ ազգային անվտանգության հարցերով խորհրդական Ջեյք Սալիվանը:
Նա նշել է, որ Ջո Բայդենը եւ Ռեջեփ Թայիփ Էրդողանը կքննարկեն շատ հարցեր, այդ թվում` մարդու իրավունքները: Ասելով, որ Բայդենը լավ է ճանաչում Էրդողանին՝ Սալիվանը նշել է, որ երկու երկրների ղեկավարները հույս ունեն օգտագործել այս հնարավորությունը, որպեսզի դիտարկեն հարաբերությունների բոլոր կողմերը»:
Նշելով, որ հանդիպման օրակարգում կլինի նաեւ Թուրքիայի դերը Աֆղանստանի բանակցություններում եւ դիվանագիտության մեջ, Սալիվանը հայտարարել է, որ հանդիպման ժամանակ կանդրադառնան նաեւ այն թեմաներին, որոնց շուրջ երկու երկրները տարբեր կարծիք ունեն։