«Քաղաքացիական պայմանագիր» կուսակցության նախընտրական խոստումները գալիք արտահերթ խորհրդարանական ընտրություններում այն խոստումների տրամաբանական շարունակությունն են, որոնք տրվել էին դեռեւս 2018թ.։ Դրանց մի մասը մենք հասցրել ու կարողացել ենք իրականացնել, իսկ մի մասը՝ առայժմ մնում է չիրականացված։ Այս մասին «Ինչպես վերականգնել տնտեսությունը անկայունության պայմաններում. քաղաքական ուժերի ծրագրային առաջարկությունները» թեմայով բանավեճի ժամանակ, հունիսի 11-ին ասաց «Քաղաքացիական պայմանագիր» կուսակցությունից պատգամավորի թեկնածու Բաբկեն Թունյանը։

Նրա խոստովանմամբ՝ շատ խոստումներ չի հաջողվել կատարել այն պատճառով, որ իշխանությունում գտնվող քաղաքական թիմը, ըստ էության, մինչեւ վերջ չի ավարտել սահմանված ժամկետը։ «Ինչ-որ բան վատ է արվել, ինչ-որ բան՝ դանդաղ։ Այնուամենայնիվ, մեր հիմնական նպատակները, տրամաբանությունն ու սկզբունքները չեն փոխվել։ Մեր նպատակը նախկինի պես մարդու բարեկեցությունն է, եւ դրա համար շեշտը պետք է դնել գիտելիքների, կրթության վրա, ինչը թույլ կտա ապահովել նորմալ, առողջ տնտեսության ձեւավորումը»,- ընդգծել է պատգամավորի թեկնածուն։

Ընդ որում՝ Թունյանի կարծիքով, կարեւոր է ոչ թե տնտեսության աճի տոկոսային ցուցանիշը, այլ դրա որակը, որը թույլ կտա երկրի քաղաքացիներին զգալ եւ գնահատել այդ աճն իր վրա։