Ներկայում քաղաքական խորհրդակցությունները կարող են վարվել եւ վարվում են ըտնրությունների ընթացքում խախտումների կապակցությամբ միայն Սահմանադրական դատարան դիմելու հարցի շուրջ, սակայն ոչ հնարավոր քաղաքական համագործակցության շուրջ: Ներկայիս խորհրդակցությունները կապված են հենց այդ հարցի հետ՝ դիմել ՍԴ, թե ոչ, համատեղ, թե ինքնուրույն: Այդ մասին հունիսի 25-ին NEWS.am-ի թղթակցի հետ զրույցում հայտարարել է «Պատիվ ունեմ» դաշինքի ներկայացուցիչ Սոս Հակոբյանը:
Նա պարզաբանել է, որ խորհրդարան չանցած քաղաքական ուժերի կողմից ՍԴ դիմելու հարցի շուրջ խորհրդակցություններ չեն անցկացվում:
Նրա խոսքով՝ ներկայում չկա հստակ տեղեկատվություն, թե «Պատիվ ունեմ» դաշինքից ով կներգրավվի պատգամավորների վերջնական ցուցակում, եւ մինչեւ Սահմանադրական դատարան դիմելու ժամկետը լրանալն այդ հարցը արդիական կլինի:
«Միայն այդ հարցը պարզաբանելուց հետո կորոշվի մանդատների եւ վերջնական ցանկի մասին թեման: ՍԴ դիմելը կախված է խախտումների կշիռից, որոնք գրանցվել են ընտրությունների ընթացքում:
Այս պահին մանդատներից հրաժարվելու մասին հայտարարություններ չկան այն թեկնածուների կողմից, որոնք, հնարավոր է, ընդգրկվեն ցուցակում: Այս հարցի վերաբերյալ քննարկումներ նույնպես չեն ընթանում, քանի որ մինչ օրս օրակարգում միայն Սահմանադրական դատարան դիմելն է», - նշել է Սոս Հակոբյանը:
Հարցին, թե քննարկվե՞լ է ՀՀ առաջին նախագահ Լեւոն Տեր-Պետրոսյանի կուսակցության հետ համագործակցության հարցը, նա պատասխանել է. ««Պատիվ ունեմ» դաշինքում այդ հարցը չի քննարկվել»:
Հիշեցնենք, որ հունիսի 20-ին Հայաստանում անցկացվեցին Ազգային ժողովի արտահերթ ընտրություններ, որոնց արդյունքների համաձայն` նոր խորհրդարանում ներկայացվելու են երեք քաղաքական ուժեր` «Քաղաքացիական պայմանագիր» (վարչապետի պաշտոնակատար Նիկոլ Փաշինյանի գլխավորությամբ), «Հայաստան» դաշինքը եւ «Պատիվ ունեմ» դաշինքը:
Ընտրությունների արդյունքում «Պատիվ ունեմ» դաշինքը խորհրդարանում ստացել է պատգամավորական 7 մանդատ:
Ընտրություններից հետո «Հայաստան» դաշինքը հայտարարել է, որ չի ճանաչում արտահերթ խորհրդարանական ընտրությունների արդյունքները եւ խախտումների պատճառով դիմելու է Սահմանադրական դատարան:
